Nafta, e qëndrueshme pranë 77 USD – Në fokus, tavani i borxhit në SHBA dhe takimi i OPEC+
Nafta po tregtohet e qëndrueshme në sesionin e sotëm, ndërsa në fokus të tregjeve është votimi i marrëveshjes për rritjen e tavanit të borxhit në SHBA, që është konsumatori më i madh i karburanteve në botë. Gjithashtu, në fokus të tregjeve është edhe takimi i OPEC+, që zhvillohet më 4 qershor. Nafta Brent e Londrës po tregtohet në rreth 77 dollarë për fuçi, ndërsa nafta Bruto amerikane po tregtohet në rreth 73 dollarë për fuçi.
Ndërkohë që marrëveshja e tavanit të borxhit ka nxitur blerjen e aktiveve me risk, prodhuesit kryesorë të naftës do të takohen më 4 qershor dhe është e paqartë nëse do të ulin sërish kuotat e prodhimit, për shkak të një rënie të përgjithshme të çmimeve, që nga mesi i prillit. Për më tepër, pritshmëritë janë që normat e interesit të SHBA të rriten më tej, duke ulur potencialisht rritjen ekonomike dhe rrjedhimisht kërkesën për naftë.
Presidenti i SHBA, Joe Biden dhe kryetari i Dhomës së Përfaqësuesve, Kevin McCarthy, gjatë fundjavës arritën një marrëveshje për të pezulluar tavanin e borxhit prej 31.4 trilion dollarë dhe kufizimin e shpenzimeve qeveritare për dy vitet e ardhshme. Të dy liderët shprehën besimin se ligjvënësit demokratë dhe republikanë do të mbështesin marrëveshjen.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.