Nafta, e qëndrueshme pranë 85 dollarë – Qeveria kineze vendos objektiv të rritjes prej 5% gjatë këtij viti
Nafta po qëndron në rënie të lehtë në sesionin e sotëm, pasi Kina ka vendosur një objektiv të rritjes ekonomike gjatë këtij viti, në rreth 5%, kundrejt pritshmërive të analistëve për një rritje me 5.5%.
Nafta Brent e Londrës po tregtohet në rreth 85 dollarë për fuçi, ndërsa nafta Bruto amerikane po tregtohet në rreth 79 dollarë për fuçi. Kryeministri i Kinës, Li Keqiang deklaroi të dielën se rritja e qëndrueshme ekonomike duhet të stabilizohet, ndërsa kërkesa e pamjaftueshme mbetet një problem i vazhdueshëm.
Njëkohësisht, analistët mendojnë se kërkesa për naftë mund të dëmtohet edhe nga rritja e interesave nga bankat qendrore në të gjithë botën, për shkak të inflacionit të lartë. Gjithashtu, edhe investitorët në tregun e naftës do të presin me një interes të veçantë dëshminë e shefit të Rezervës Federale, Jerome Powell në Kongres.
Gjatë fundjavës, presidentja e Bankës Qendrore Europiane, Christine Lagarde deklaroi se me shumë mundësi normat e interesit do të rriten edhe në takimin e këtij muaji, për shkak se inflacioni në Eurozonë rezultoi në 8.5% për shkurtin, shumë më lart se objektivi prej 2%.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.