Nafta humb mbi 3 dollarë – Komentet e Powell rikthejnë shqetësimet për ngadalësimin e kërkesës

Nafta ka humbur mbi 3 dollarë në sesionin e kaluar amerikan dhe po qëndron në rënie edhe në sesionin e sotëm, pas komenteve të shefit të Rezervës Federale, Jerome Powell, për të vijuar me politikën monetare shtrënguese. Edhe forcimi i dollarit amerikan dhe të dhënat negative mbi tregtinë në Kinë kanë ushtruar presion mbi çmimet. Nafta Brent e Londrës po tregtohet në 83 dollarë për fuçi, ndërsa në sesionin e kaluar ra me 2.9 dollarë.

Nafta Bruto amerikane po tregtohet në rreth 77 dollarë për fuçi, pas humbjeve me rreth 3.6% në sesionin e kaluar. Të dyja kontratat publikuan humbjet më të mëdha ditore që nga 4 janari i këtij viti. Powell tha përpara kongresit se, FED duhet të rrisë normat e interesit më shumë se vlerësimet e mëparshme, pasi ekonomia ka shfaqur shenja të forta, duke rrëzuar tregun e lëndëve të para dhe të aksioneve. Gjithashtu, edhe të dhënat e dobëta mbi tregtinë në Kinë kanë ushtruar presion mbi çmimet. Referuar të dhënave zyrtare, eksportet ranë me 6.8% gjatë shkurtit, ndërsa analistët parashikonin një rënie me 9.4%.

Në anën tjetër, edhe importet ranë me 10.2%, dyfish më shumë se parashikimet e tregjeve për një rënie me 5.5%. Investitorët po presin edhe të dhënat mbi rezervat e naftës në SHBA dhe analistët parashikojnë një rënie për të 11-ën javë me radhë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.