Nafta i rikthehet sërish humbjeve – Kina vendos kufizime, si pasojë e rritjes së infektimeve me Covid-19

Nafta i është rikthyer sërish humbjeve në sesionin e sotëm, për shkak të rritjes së infektimeve me Covid-19 në Kinë, që është importuesi më i madh i naftës bruto në botë, dhe shqetësimeve që kanë të bëjnë me ngadalësimin e ekonimisë globale.

Nafta Brent e Londrës po tregtohet në rreth 105 dollarë për fuçi, ndërsa nafta Bruto amerikane po tregtohet në rreth 102 dollarë për fuçi. Shumë qytete në Kinë po vendosin masa kufizuese kundër Covid-19, pasi nënvarianti i ri i Omicron është zbuluar në vend. Në anën tjetër, sanksionet e vendeve perëndimore ndaj Rusisë, për shkak të luftës në Ukrainë, kanë kufizuar humbjet.

Ndërkohë, shqetësimet për ndërprerjen e furnizimit nga Konsorsiumi i Tubacionit Kaspik u lehtësuan disi pasi një gjykatë ruse përmbysi një vendim të mëparshëm, që pezullonte operacionet e tubacionit për 30 ditë. Megjithatë, ekziston ende frika se Rusia mund ta pezullojë këtë tubacion, i cili transporton naftë nga Kazakistani në Detin e Zi, duke ndërprerë potencialisht rreth 1% të furnizimit global.

Gjithashtu, rezervat në vendet anëtare të OPEC po pakësohet dhe rafineritë po pompojnë me kapacitet maksimal. Presidenti amerikan, Joe Biden do t’i kërkojë OPEC të rrisë prodhimin, gjatë takimit që do të zhvillojë me drejtuesit e vendeve të Gjirit, këtë javë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.