Nafta, në nivelin më të lartë që nga 30 dhjetori – Mbështetet nga rihapja e Kinës dhe nga sanksionet e BE ndaj naftës ruse

Nafta po qëndron në rritje edhe në sesionin e sotëm, duke publikuar fitime për të katërtin sesion me radhë. Çmimet janë mbështetur nga pritshmëritë se kërkesa do të rimëkëmbet ndjeshëm, sidomos nga Kina pas vendimit të qeverisë për të hapur kufijtë për herë të parë në 3 vitet e fundit.

Edhe efektet e sanksioneve të Bashkimit Europian ndaj naftës ruse po ofrojnë një mbështetje për çmimet. Nafta Brent e Londrës po tregtohet në rreth 83 dollarë për fuçi, ndërsa nafta Bruto amerikane po tregtohet në rreth 78 dollarë për fuçi.

Të dy bençmarkët u rritën me rreth 3% në sesionin e kaluar, duke prekur nivelin më të lartë që nga 30 dhjetori. Kina, që është importuesja më e madhe e naftës në botë, po rihap ekonominë duke i dhënë fund politikës zero-Covid.

Prodhimi industrial në Kinë parashikohet të jetë rritur me 3.6% në vitin 2022, pavarësisht se ishin ende në fuqi masat kufizuese kundër përhapjes së Covid-19.

Ndër zhvillimet e tjera, Agjencia amerikane për Informimin mbi Energjinë deklaroi se sanksionet e Bashkimit Europian ndaj importeve të nënprodukteve të naftës ruse, që hyjnë në fuqi më 5 shkurt, mund të çrregullojnë furnizimin në Europë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.