Nafta, në nivelin më të lartë që nga 30 gushti – Mbështetet nga ulja e prodhimit të OPEC dhe sanksionet e BE-së ndaj Rusisë
Nafta po qëndron në rënie të lehtë në sesionin e sotëm, por po qëndron në nivelin më të lartë në 5 javët e fundit. Çmimet janë mbështetur nga vendimi i OPEC+ për të ulur prodhimin dhe nga embargoja e Bashkimit Europian ndaj naftës ruse.
Nafta Brent e Londrës po tregtohet në rreth 97 dollarë për fuçi, ndërsa naf ta Bruto amerikane po tregtohet në rreth 92 dollarë për fuçi. Të dyja kontratat prekën nivelin më të lartë që nga 30 gushti në sesionin e ditës së premte të javës së kaluar.
Sanksionet e Bashkimit Europian ndaj naftës bruto të Rusisë dhe nënprodukteve të saj do të hyjnë në fuqi në dhjetor dhe janar respektivisht. Por, pavarësisht kësaj analistët vlerësojnë se në tregje ka shumë paqartësi, sidomos mbi mënyrën se si do të preket Europa nga mungesa e naftës ruse.
Në këtë situatë, analistët kanë rritur parashikimin për çmimin e naftës Brent në mbi 100 dollarë për fuçi në muajt në vijim. Por, nëse do të ketë një rritje të infektimeve me Covid-19 në Kinë, kërkesa mund të dëmtohet ndjeshëm dhe çmimet mund të kenë një tendencë në rënie.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.