Nafta, në nivelin më të ulët në 1 vit – Mbyllja e përkohshme e një tubacioni në SHBA mbështet çmimet
Nafta po qëndron në rritje të lehtë në sesionin e sotëm, për shkak të mbylljes së një tubacioni që transporton naftë mes Kanadasë dhe Shteteve të Bashkuara të Amerikës, por megjithatë po qëndron në nivelin më të ulët që nga dhjetori i vitit 2021. Investitorët janë të shqetësuar për ngadalësimin e ekonomisë globale, që do të dëmtojë edhe kërkesën për naftë. Brenti i Londrës po tregtohet në rreth 76 dollarë për fuçi, ndërsa në sesionin e kaluar ra me 1.3%.
Nafta bruto amerikane po tregtohet në rreth 72 dollarë për fuçi. Lajmet për një aksident pranë tubacionit Keystone në Shtetet e Bashkuara i rriti fillimisht çmimet, por situata u qetësua pas njoftimit se mbyllja do të jetë shumë e shkurtër. Nafta Bruto amerikane ka shkuar pranë 70 dollarëve, nivel në të cilin administrata e presidentit Joe Biden ka deklaruar se do të konsiderojë mbushjen e rezervave strategjike.
Në mbyllje të sesionit të sotëm, çmimet e naftës pritet të realizojnë humbjet më të mëdha javore në disa muaj. Në anën tjetër, çmimet po gjejnë një mbështetje nga lehtësimi i masave kundër Covid-19 në Kinë. Por, analistët vlerësojnë se do të duhet disa muaj, përpara se këto lehtësime të reflektohen në rritjen e kërkesës.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.