Nafta tregtohet pranë 73 USD për fuçi – G7 nuk do të ndryshojë tavanin prej 60 USD për naftën ruse

Nafta është kthyer në rënie në sesionin e sotëm, pasi trazirat në tregun bankar kanë dobësuar besimin e investitorëve. Nafta Brent e Londrës për majin po tregtohet në rreth 73 dollarë për fuçi, ndërsa nafta Bruto amerikane po tregtohet në rreth 67 dollarë për fuçi.

Të hënën, të dyja kontratat ranë me rreth 3 dollarë, por gjatë sesionit amerikan rikuperuan një pjesë të humbjeve, pas angazhimit të bankave më të mëdha qendrore për të ofruar likuiditet për tregun.

Në fokus të tregjeve është edhe takimi i Rezervës Federale, që fillon sot dhe përfundon të mërkurën, i cili mund të ketë ndikim në ecurinë e monedhës amerikane. Një dollar më i fortë i bën lëndët e para që tregtohet në monedhën e gjelbër më të shtrenjta për zotëruesit e monedhave të tjera.

Ndër zhvillimet e tjera, zyrtarët e G7-ës, deklaruan se nuk ka gjasa të rishikojnë tavanin e çmimit prej 60 dollarë për fuçi për naftën ruse. Në fokus të tregjeve është edhe takimi i OPEC dhe aleatëve të tjerë, me në krye Rusinë, që do të zhvillohet më 3 prill. Ndërkohë, eksportet e naftës bruto nga Shtetet e Bashkuara drejt Europës arritën një rekord prej 2.1 milionë fuçi në ditë, gjatë këtij muaji, pasi blerësit kanë përfituar nga çmimi i ulët i naftës bruto amerikane.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.