Nafta tregtohet pranë 95 dollarë – Infektimet me Covid-19 në Kinë dëmtojnë kërkesën. Pritet raporti i OPEC
Nafta e ka nisur në rënie të lehtë këtë javë, për shkak të shqetësimeve se rritja e infektimeve me Covid-19 në Kinë, do të dëmtojë kërkesën. Në anën tjetër, edhe rritja e prodhimit të naftës argjilore në SHBA po ushtron presion mbi çmimet. Nafta Brent e Londrës po tregtohet në rreth 95 dollarë për fuçi, ndërsa në sesionin e së premtes ra me 1.2%.
Nafta Bruto amerikane po tregtohet në rreth 87 dollarë për fuçi. Pavarësisht disa lehtësimeve, qeveria në Kinë vijon të ndjekë politikën zero-Covid dhe vendosen në karantinë qytete të tëra, pavarësisht se rastet janë të pakët në numër.
Ndër zhvillimet e tjera, eksportet e naftës në SHBA shënuan një nivel rekord, gjatë javës së kaluar duke bërë që nafta Brent të rritet me 2.4% dhe nafta Bruto me 3.4%, gjatë javës që u mbyll më 28 tetor.
Gjithashtu, tregjet po presin edhe parashikimet mbi ecurinëë e tregut, nga Organizata e Vendeve Eksportuese të Naftës, që do të publikohet më vonë gjatë ditës së sotme. Paralelisht, fitimet e jashtëzakonshme nga kompanitë e naftës, si pasojë e çmimeve të larta, kanë rikthyer në vëmendje vendosjen e taksave shtesë për këto kompani.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.