Nafta vijon qëndrueshmërinë pranë 80 USD – Paqartësi mbi lehtësimin e masave kundër Covid-19 në Kinë

Nafta po tregtohet e qëndrueshme edhe në sesionin e sotëm, ndërsa po gjendet nën presion të lehtë nga dobësimi i dollarit amerikan përballë monedhave kryesore ndërkombëtare. Gjithashtu, edhe paqartësitë në lidhje me ndikimin që do të kenë masat lehtësuese kundër Covid-19 në Kinë, po ushtrojnë presion mbi çmimet. Nafta Brent e Londrës po tregtohet pranë 80 dollarëve për fuçi, ndërsa nafta Bruto amerikane po tregtohet në rreth 75 dollarë për fuçi.

Të dyja kontratat u rritën me rreth 1 dollar në sesionin e kaluar. Çmimet u mbështetën nga plani i Shteteve të Bashkuara për të blerë rreth 3 milionë fuçi naftë për të mbushur rezervat strategjike. Një dollar më i dobët i mbështet çmimet, pasi i bën lëndët e para më të lira për zotëruesit e monedhave të tjera. Në një kohë që Kina po lehtëson masat kundër Covid-19, rritja e fundit e infektimeve ka shtuar paqartësitë mbi vendimet që do të marrin autoritetet.

Referuar zhvillimeve të tjera, rezervat e naftës bruto në SHBA parashikohet të kenë rënë me rreth 200 mijë fuçi, javën e kaluar, sipas një sondazhi të Reuters. Në tregun e metaleve të çmuara, ari po tregtohet shumë pranë 1800 dollarëve për onz, ndërsa argjendi po tregtohet në mbi 23 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.