Nafta zgjeron humbjet – Rritja e infektimeve me Covid-19 në Kinë dëmton kërkesën

Nafta po qëndron në rënie edhe në sesionin e sotëm, duke zgjeruar humbjet e një dite më parë, për shkak se rritja e infektimeve me Covid-9 në Kinë mund të dëmtojë kërkesën nga importuesja më e madhe e naftës në botë. Shkalla e shpërthimit të fundit të infektimeve dhe dyshimet mbi të dhënat zyrtare të qeverisë kineze kanë detyruar disa vende të vendosin rregulla të reja për udhëtarët që vijnë nga Kina.

Nafta Brent e Londrës po tregtohet në rreth 82 dollarë për fuçi, ndërsa nafta Bruto amerikane po tregtohet në rreth 78 dollarë për fuçi. Ndërkohë, tregjet parashikojnë edhe një tjetër rritje të normës bazë të interesit në Shtetet e Bashkuara për të parandaluar rritjen e çmimeve. Referuar të dhënave të tjera, rezervat e naftës bruto në SHBA ranë më pak se parashikimet gjatë javës që u mbyll më 23 dhjetor.

Rezervat e naftës ranë me 1.3 milionë fuçi, ndërsa analistët parashikonin një rënie me 1.5 milionë fuçi. Gjithsesi, tregjet kanë gjetur një mbështetje nga deklarata e presidentit rus, Vladimir Putin, i cili tha se duke filluar nga 1 shkurti, për një periudhë 5 mujore, do të ndalohen eksportet ndaj vendeve që vendosën tavan mbi çmimet.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.