Ndërsa inflacioni rritet, Eurozona do të ketë rritjen e parë të normës së interesit në 11 vjet!

Banka Qendrore Europiane (BQE) ka konfirmuar se do të rrisë normat e interesit në një përpjekje për të ulur çmimet në rritje në të gjithë zonën euro. Rritja do të jetë prej 0.25 pikë përqindjeje, në përputhje me atë që kishin pritur shumica e analistëve dhe do të ndodhë në korrik, tha presidentja e BQE-së Christine Lagarde.

Një tjetër rritje do të ndodhë në shtator, e cila mund të jetë më e madhe se 0.25 nëse inflacioni “vazhdon ose përkeqësohet”. Njoftimi shënon rritjen e parë të normave të interesit që nga viti 2011 dhe mbyll një kapitull të gjatë të politikës së lirshme monetare. Për muaj të tërë, Lagarde kishte përdorur fjalën “i përkohshëm” për të përshkruar rritjen e inflacionit. Por pasi Rusia nisi pushtimin e saj në Ukrainë, parashikimet ekonomike u kthyen përmbys dhe tendenca u përkeqësua më tej.

I shtyrë nga lufta, një krizë e vazhdueshme e energjisë dhe një ndërprerje e re e zinxhirit të furnizimit, inflacioni në eurozonë shënoi një rekord prej 8.1% në maj, katër herë më shumë se objektivi vjetor prej 2% i dëshiruar nga banka qendrore. Konsumatorët dhe kompanitë tani përballen me çmime të paparashikueshme, duke i vënë politikëbërësit nën presion për të ofruar zgjidhje të prekshme, edhe nëse mund të bëjnë pak në afat të shkurtër për të bërë një ndryshim.

Inflacioni po përndjek ekonomitë e tjera të zhvilluara, bankat e të cilave kanë sinjalizuar tashmë synimin e tyre për të rritur normat e interesit përpara se të vendoset stagflacioni. BQE pret që inflacioni të mbetet “në mënyrë të padëshirueshme” i lartë për dy vitet e ardhshme: 6.8% në 2022, 3.5% në 2023 dhe 2.1% në 2024.

Lagarde vlerësoi heqjen e kufizimeve të koronavirusit, tregun e fortë të punës, mbështetjen fiskale dhe kursimet e grumbulluara nga qytetarët gjatë pandemisë si faktorë që mund të mbajnë ekonominë të ecë përpara, megjithëse me një ritëm më modest se sa ishte parashikuar më parë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.