“Ndërtimet pa leje do konfiskohen për përdorim publik” – Balluku: Synojmë dekurajimin e kompanive ndërtuese që shkelin ligjin

Këshilli i Ministrave ka miratuar këtë të mërkur një akt që penalizon ndërtimet pa leje duke konfiskuar shtesat e kryera në kundërshtim me ligjin. Lajmin e ka bërë të ditur zv.kryeministrja Belinda Balluku e cila tha se këto shtesa do shkojnë në ndihmë të qytetarëve të cilët preken nga projekte publike.

“Akti ka të bëjë me të gjitha ndërtesat pa leje në Shqipëri ose siç ka të bëjë me një trend të ndërtimit të shtesave mbi lejen e dhënë. Ky lloj trendi ka  një lloj sjellje që pavarësisht se leja ka 7 kate i bëjmë dhe 3 kate për t’i legalizuar më pak. Kjo nuk do të lejohet më. Të gjitha këto ndërtesa të cilat kanë këtë lloj specifike do të konfiskohen për përdorim publik. Për çdo ndërtesë që rezulton se ka shkelur lejen ose çdo ndërtesë të ndërtuar pa leje do te këtë edhe një investigim për institucionet që kanë pasur për detyrë kontrollin e territorit. Nuk do të ketë tolerancë për asnjë nga ndërtuesit që kanë ndërtuar pa leje. Gjithçka që është ndërtuar pa leje do të kalojë në përfitim të popullit”, u shpreh Balluku.

Për ndërtuesit pa leje zv.kryeministrja deklaroi se përveç gjobës do të duhen dhe të paguajnë atë shtesë që kanë bërë nëse duan ta kenë pronë të tyre.

Marinela Lina / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.