Ndihmën shtetërore e luajnë në baste! – Raporti në Britani, fenomeni është përhapur pas shtrenjtimit të kostos së jetesës
Britanikët me probleme me lojërat e fatit kanë vendosur në baste përfitimet e tyre shtetërore në një përpjekje për të mbuluar faturat e kripura, ndërsa kriza e kostos së jetesës përshkallëzohet, paralajmëroi një organizatë bamirëse.
Një raport i ri nga GamCare, që ofron mbështetje për njerëzit me probleme të lojërave të fatit, tregoi se ky grup kishte shumë më tepër gjasa se popullata e përgjithshme për të paguar ushqimet, ose për t’u ngrohur në shtëpi.
Hulumtimi, i bazuar në një sondazh të YouGov me më shumë se 4,000 persona, vjen pasi rregullatorët britanikë i vendosën një gjobë rekord prej 19.2 milionë paund grupit të basteve William Hill pasi nuk arriti të mbronte konsumatorët dhe të ndalonte pastrimin e parave.
“Ajo që ne po shohim ende është një përqindje e atyre që janë goditur më shumë nga kriza e kostos së jetesës, duke qenë se kërkojnë lojrat e fatit për të lehtësuar shqetësimet e tyre për para’,” tha Anna Hemmings, shefe ekzekutive e GamCare.
Sondazhi i YouGov, tregoi se 20% e njerëzve që përjetonin dëme nga kumari ishin përpjekur për të paguar ushqimet.
Qeveria ka kërkuar të shtrëngojë rregullat e lojërave të fatit në vitet e fundit për të parandaluar varësinë, duke kufizuar aksionet maksimale në terminale dhe ndaluar përdorimin e kartave të kreditit për të vendosur baste.
Në kompaninë William Hill, Komisioni i Lojërave të Fatit konstatoi shumë probleme. Një klient shpenzoi 23,000 paund në 20 minuta pa asnjë kontroll, ndërsa një tjetër humbi 14,900 paund në 70 minuta. GamCare tha se kishte nisur një shërbim të ri udhëzues, për të ndihmuar personat me probleme të lojërave të fatit që t’i kthejnë financat e tyre në rrugën e duhur.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.