Ndjesia e konsumatorit në SHBA – I afrohet nivelit më të ulët të 11 viteve. Çmimet mujore të importit, të pandryshuara
Treguesi i ndjesisë së konsumatorit në SHBA ra në nivelin më të ulët në gati 11 vjet në fillim të majit, ndërsa shqetësimet për inflacionin vazhduan, por shpenzimet e familjeve mbeten të mbështetura nga një treg i fortë pune dhe kursime masive, të cilat duhet të mbajnë ekonominë në zgjerim. Sondazhi i Universitetit të Miçiganit, tregoi përkeqësimin e ndjesisë, për të cilën disa ekonomistë thanë se e shtyu atë në një territor recesioni. Çmimet e benzinës dhe bursa kanë një peshë të rëndë në vrojtim.
Çmimet e benzinës regjistruan trendin e tyre rritës këtë muaj, duke vendosur një rekord mesatar prej 4,432 dollarë për gallon të premten. Frika se Rezerva Federale do të duhet të shtrëngojë në mënyrë agresive politikën monetare për të ulur inflacionin, kanë shkaktuar një shitje masive të aksioneve në Ëall Street.
Indeksi paraprak i ndjesisë së konsumatorit të Universitetit të Miçiganit ra me 9.4%, në 59.1 në fillim të këtij muaji, shifra më e ulët që nga gushti 2011. Ekonomistët e anketuar nga Reuters kishin parashikuar rënien e indeksit në 64. Rënia e mprehtë është në kontrast të plotë me sondazhin e besimit të konsumatorëve të Bordit të Konferencës, indeksi i të cilit mbetet shumë mbi nivelet më të ulëta të pandemisë COVID-19.
Anketa e Bordit të Konferencës vendos më shumë theks në tregun e punës, i cili po krijon vende pune me shpejtësi. Pagat po rriten gjithashtu, ndërsa punëdhënësit përpiqen të plotësojnë një rekord prej 11.5 milionë vendesh pune që nga fundi i marsit.
Matësi i kushteve aktuale ekonomike të studimit të Universitetit të Miçiganit ra me 8.4%, në 63.6. Kjo ishte shifra më e ulët që nga viti 2013, dhe 36% e konsumatorëve ia atribuan vlerësimin e tyre negativ inflacionit. Masa e tij e pritjeve të konsumatorëve ra me 9.9% në 56.3.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.