Ndryshon Vetting në polici, në sitë 300 drejtues – Çuçi, në Kuvend: OFL vijon, janë vënë nën hetim pasuritë e 2199 subjekteve

Në një interpelancë të kërkuar nga Deputeti i Partisë Demokratike Ervin Salianji, Ministri i Brendshëm Bledi Çuçi ka bërë publike rezultatet e Operacionit Forca e Ligjit dhe të Vetting-ut në radhët e Policisë së Shtetit. Salianji akuzoi se që të dyja nismat u ndërmorën përpara zgjedhjeve të vitit 2021. E para për t’i bërë presion krimit në mënyrë që ai t’i bashkohej mazhorancës në zgjedhje, por edhe për të pastruar pasuritë e një pjese të tyre. E dyta, Vetting-u në polici, për të vënë nën presion forcat e rendit që edhe ata të viheshin në shërbim të Partisë Socialiste.

Ministri e quajti moment historik operacionin OFL, duke raportuar se përmes tij u vunë nën hetim pasuritë e 2199 subjekteve, si dhe të familjarëve të tyre. Ai tha se ju kërkua vetëdeklarimi i 741 personave, dhe 124 familjarë të tyre.

Sa për Vetting-un në Polici, Çuçi tha se ishte ndjekur këshilla e ndërkombëtarëve për kalimin në sitë vetëm të niveleve drejtuese të forcave të rendit. Ai paralajmëroi se shumë shpejt do të paraqiten ndryshimet përkatëse ligjore të cilat parashikojnë që të kalohen në sitë 300 drejtues të lartë.

Salianji akuzoi gjithashtu se në një kohë që Vetting-u në polici është pezulluar, organet që e kryejnë këtë process vijojnë të paguhen me miliona lekë nga taksat e shqiptarëve.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.