Në riparim sistemi i shitblerjeve të energjisë elektrike – OST, 22.4 milionë lekë për mirëmbajtjen dhe zhvillimin e sistemit “DAMAS”

Do të kryhet pas 3 vitesh riparimi i sistemit të anakandeve dhe të menaxhimit të të dhënave energjetike të implementuar në ambjentet teknologjike pranë Aparatit Qëndror të Operatorit të Sistemeve të Transmetimit. OST i cili ka për funksion furnizimin e pandërprerë me energji elektrike të nënstacioneve të shpërndarjes si dhe transmetimin e shkëmbimeve të saj me vendet e rajonit ka hapur tenderin me vlerë 22.4 milionë lekë pa TVSH për mirëmbatjen dhe zhvillimin e këtij sistemi.

Platforma DAMAS është një sistem i centralizuar që shërben si referencë dhe përgjegjës mbi menaxhimin e tregut të Operatorit të Sistemit të Transmetimit me anë të këtij sistemi ofrohet menaxhimi i gjithë proceseve që lidhen me menaxhimin e shërbimeve të tregut. Këto procese janë implementuar në mënyrë të tillë që të sigurojnë besueshmëri, saktësi, siguri  në perputhje me aktet ligjore dhe rregullatore.

Shërbimet e nevojshme në kuadër të mirëmbajtjes së avancuar përfshijnë riparimin e çdo defekti, i cili mund të ndodhë gjatë operimit të këtij sistemi nga OST apo palë të treta, të cilat përdorin ketë sistem. Përgjegjësia kryesore e ekipit të Mirëmbajtjes dhe Mbështetjes është për të mbajtur sistemin në kushte operative por mund të ofrojë edhe përmirësime në sistem.

Ky sistem ka disa funksione të ndara në module të përcaktuara si realizimi i ankandeve të kapacitetit, skedulimi i përdorimit të kapacitetit ndërkufitar dhe atij të brendshëm, llogaritja e Energjisë në Kufi, mekanizmi i Balancimit, prokurimi i Shërbimeve Ndihmëse, njoftimi i Kontratave dhe menaxhimi i të dhënave energjitike si dhe prokurimi i energjisë për mbulimin e humbjeve në rrjetin e transmetimit.

Marinela Lina / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.