Nën hetim ndërtuesit e pallateve në Turqi – Akuzohen për mos zbatim të standarteve të sigurisë

Sipas të dhënave zyrtare të qeverisë turke, më shumë se 600 mijë apartamente dhe 150 mijë objekte tregtare kanë pësuar dëmtime mesatare, si pasojë e tërmetit shkatërrues që goditi vendin. Presidenti turk Erdoan ka premtuar se banesat do të rindërtohen brenda këtij viti.

Turqia ndërkohë do të zgjerojë hetimet ndaj ndërtuesve të dyshuar për shkelje të standardeve të sigurisë pas tërmetit shkatërrues, tha ministri i brendshëm Sulejman Soylu, ndërsa vendi shtoi planet e strehimit për viktimat. Ai shtoi se deri tani janë identifikuar 564 të dyshuar, dhe 160 persona janë arrestuar, ndërsa shumë të tjerë janë ende nën hetim. Ministri turk shtoi se qytetet e vendit do të rindërtohen dhe fëmijët do të jetojnë në vende më të sigurta.

Në pushtet prej dy dekadash, Erdogan përballet me zgjedhjet e përgjithshme brenda katër muajve. Edhe para tërmetit, sondazhet treguan se ai ishte nën presionin e një krize të kostos së jetesës, e cila mund të përkeqësohet pasi fatkeqësia natyrore që goditi vendin ka ndërprerë prodhimin bujqësor.

Soylu tha se janë ngritur rreth 313 mijë tenda, ndërsa do të instalohen në zonat e prekura nga tërmeti, 100 mijë shtëpi me kontejnerë. Ndërkohë numri i viktimave të tërmetit është mbi 45.500. Në vend janë regjistruar 7 930 pasgoditje pas tërmetit të parë të 6 shkurtit.

Turqia nisi një skemë të përkohshme të mbështetjes së pagave të mërkurën dhe ndaloi pushimet nga puna në 10 qytete për të mbrojtur punëtorët dhe bizneset nga ndikimi financiar i tërmetit masiv që goditi jugun e vendit. Tërmeti me magnitudë 7.8 ballë i 6 shkurtit dëmtoi ose shkatërroi qindra mijëra ndërtesa dhe la miliona persona të pastrehë.

Rreth 865 mijë njerëz jetojnë në tenda dhe 23 500 në shtëpi me kontejnerë, ndërsa 376 mijë janë strehuar në konvikte studentore dhe bujtina publike jashtë zonës së tërmetit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.