Nis aksioni kundër vjedhjes së energjisë – Operacioni, për përballimin e krizës. Në 6 muaj, OSHEE kapi vetëm 3.5% të lidhjeve të paligjshme

Javën e ardhshme qeveria do të nisë aksionin kundër lidhjeve të paligjshme të energjisë elektrike. Gjithçka është bërë me dije nga Ministria e Brendshme, duke specifikuar se do të jetë kreu i deritanishëm i Inspektoratit Kombëtar të Mbrojtjes së Territorit, Ajez Zyberi, i cili do të drejtojë operacionin e ri kombëtar të Task Forcës.

Po ashtu, sipas Ministrisë së Brendshme funksionimi i Task – Forcës vjen pas shpalosjes së planit të qeverisë për të përballuar vjeshtë – dimrin në kushtet e krizës ndërkombëtare të energjisë.

Niveli i lartë i vjedhjeve të energjisë i kushton buxhetit të Koproratës Elektoroenergjetike Shqiptare miliona euro, që aktuliasht është e autorizuar për blerjet e energjisë, teksa vetëm për 6 muajt e parë të këtij viti kjo shifër përllogaritet në rreth 65 mln euro.

Sipas të dhënave nga Enti Rregullator i Energjisë për periudhën janar – qershor humbjet joteknike në rrjetin e shpërndarjes, ku bëjnë pjesë pikërisht vjedhjet e energjië ishin 281 368 mwh, teksa çmimi mesatar me të cilin ka blerë energji KESH përgjatë kësaj periudhe ishte 230.1 euro/mwh.

Ndërkaq, nëse marrim në konsideratë tendencën në rritje të çmimeve të energjisë në tregjet ndërkomëbatre në muajt korrik dhe gusht, atëhere fatura do të jetë edhe më e lartë. Paralelisht, të dhënat zyrtare tregojnë se pavarësisht nivelit të lartë të vjedhjeve të energjisë, Operatori i Shpërndarjes së Energjisë Elektrike nuk ka mundur të faturojë as 5% të tyre.

Sipas të dhënave, në 6 – mujorin e parë të këtij viti janë faturuar si dëm ekonomik 9 918 Mwh energji, apo vetëm 3.5% e vjedhjeve.  Prej vitit 2020, kushdo që vjedh energjinë elektrike penalizohet me ‘gjobë kilovatësh” apo thënë ndryshe, sasia e energjisë e konsumuar në formë të paligjshme, konvertohet në lekë dhe faturohet.

Sipas rregullores, çmimi me të cilin faturohen klientët që vjedhin energjinë elektrike, përllogaritet mbi bazën e çmimit mesatar për kwh, të blerë për mbulimin e humbjeve në periudhën që do të faturohet dëmi ekonomik, kostot e transmetimit dhe kostot e rrjetit në të cilin është kyçyr përdoruesi për secilën kategori të tij.

Ndalimi i vjedhjeve të energjisë elektrike ishte një nga aksionet e parë që ndërmori qeveria në vitin 2015, si pjesë e reformës në sektorin energjetik. Në atë kohë, kryeministri Edi Rama deklaroi se nuk janë të varfrit ata që vjedhin energjinë, por konsumatorë të veçantë që mbrohen nga shteti për qëllime elektorale. Në fakt, pas vitit 2015 niveli i humbjeve joteknike pësoi rënie të ndjeshme, por gjithsesi shifrat aktuale tregojnë se ato mbeten të larta.

Ola Mitre / SCAN

 

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.