Nis kërkimi i arit, jepet leja minerare – Investimi për zbulimin, 40.12 milionë lekë. Kërkime të reja edhe për bakër

Procedura konkurruese për kërkimin e mineralit të arit, e hapur pak kohë më parë, ka rezultuar e suksesshme, teksa Ministria e Infrastrukutrës dhe Energjisë ka dhënë lejen minerare. Sipas njoftimit zyrtar zona ku do të përqëndrohet veprimtraia e kërkim – zbulimit ndodhet në Babje të Librazhdit, teksa vlera totale e investimit parashikohet në 40.12 mln lekë.

Kjo është hera e parë, pas shumë vitesh që jepet një leje minerare për kërkimin e këtij minerali, teksa paralelisht, me këtë procedurë është dhënë edhe një tjetër leje për kërkim – zbulimin e bakrit në zonën e Mirditës, si dhe një tjetrë leje për shfytëzim, për gurin gëlqeror.

Procedurat bazohen në planet minerare të miratuar në vitet e kaluar, por edhe në planin e ri për zhvillimin e sektorit 2022-2024. Sipas këtij të fundit zhvillimi i aktivitetit minerar në 3 vitet e ardhshëm fokusohet kryesisht në nxjerrjen e gurit gëlqeror, gurit dekorativ dhe gurit gëlqeror të mermerizuar.

Në bazë të dokumentit zyrtar parashikohet hapja e procedurave konkurruese apo zhvillimi i proceduarve të hapura për 62 zona minerare, teksa vetëm një numër shumë i kufizuar pritet të jepet për nxjerrjen e mineralit të kromit.

Për këtë të fundit, planifikohet  dhënia e 2 zonave minerare, ndërsa 3 zona të tjera do të jepen për mineralin e bakrit. Në krahasim me planin 2019 – 2021 ka një reduktim të zonave minerare, pasi plani për 3-vjeçarin që lamë pas përcaktonte hapjen e garave konkurruese për 78 zona  minerare, apo 16 më shumë se ai aktual.

Ndërkohë që, sa i takon rritjes së produktit vjetor, parashikohet të mos ketë ndryshime, duke qëndruar në deri 5%.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.