Nisin shpronësimet për “rikonstruksionin e rrugës Pogradec – Tushemisht – Doganë” / Rreth 32 milion lekë për përfituesit

Nëpërmjet një njoftimi të publikuar në Vendimin e Këshillit të Ministrave është bërë me dije se me propozimin e Zëvendëskryeministrit dhe ministër i Infrastrukturës dhe Energjisë është vendosur të bëhet shpronësimi, për interes publik, të pronarëve të pasurive të paluajtshme, pronë private, që preken nga realizimi i projektit “rikonstruksioni i rrugës Pogradec – Tushemisht – Doganë”

Shpronësimi bëhet në favor të Bashkisë Pogradec dhe pronarët e pasurive të paluajtshme, pronë private, që shpronësohen, kompensohen në vlerë të plotë, sipas masës përkatëse, për pasuritë e llojit “arë” dhe “truall”, me një vlerë të përgjithshme prej 32 356 650 (tridhjetë e dy milionë e treqind e pesëdhjetë e gjashtë mijë e gjashtëqind e pesëdhjetë) lekësh.

Vlera e përgjithshme e shpronësimit do të përballohet nga llogaria “Fondi i shpronësimeve” në Bankën e Shqipërisë.

Vlera e shpenzimeve procedurale, në masën 50 000 (pesëdhjetë mijë) lekë, përballohet nga buxheti i miratuar për Ministrinë e Infrastrukturës dhe Energjisë.

Ngarkohen Ministria e Financave dhe Ekonomisë, Ministria e Infrastrukturës dhe Energjisë, Agjencia Shtetërore për Shpronësimin, Bashkia Pogradec, Agjencia Shtetërore e Kadastrës, Drejtoria Vendore Pogradec dhe Drejtoria e Administrimit dhe Mbrojtjes së Tokës pranë Këshillit të Qarkut Korçë për zbatimin e këtij vendimi. Ky vendim hyn në fuqi menjëherë dhe botohet në “Fletoren zyrtare”.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.