OBSH: Bota po përballet me sfida ‘të frikshme’ ndërsa lija e majmunëve është përhapur në 15 vende jashtë Afrikës!

Bota po përballet me sfida “të frikshme”, duke përfshirë Covid-in, luftën në Ukrainë dhe linë e majmunëve, ka paralajmëruar kreu i Organizatës Botërore të Shëndetësisë, Tedros Adhanom Ghebreyesus ndërsa po fliste në Gjenevë, ku ekspertët e agjencisë shëndetësore të OKB-së po diskutonin për shpërthimin e lisë së majmunëve në 15 vende jashtë Afrikës.

Lija e majmunit, virusi që është më i zakonshëm në pjesët e largëta të Afrikës Qendrore dhe Perëndimore nuk ka tendencë të përhapet lehtësisht midis njerëzve dhe sëmundja zakonisht është e lehtë. Shumica e njerëzve që kapin virusin shërohen brenda pak javësh, sipas Shërbimit Shëndetësor Kombëtar të Mbretërisë së Bashkuar.

Përhapja i ka habitur shkencëtarët dhe zyrtarët shëndetësorë në Mbretërinë e Bashkuar kanë lëshuar këshilla të reja, duke thënë se kontaktet me rrezik të lartë të rasteve duhet të izolohen për tre javë. Belgjika u bë vendi i parë që shpalli një karantinë tre-javore për personat e infektuar të premten. Më shumë raste të konfirmuara pritet të shpallen në Mbretërinë e Bashkuar të hënën, raporton gazeta Guardian.

Duke folur në hapjen e Asamblesë Botërore të Shëndetit të agjencisë së tij të dielën, Dr Tedros tha: “Sigurisht që pandemia [Covid] nuk është e vetmja krizë në botën tonë. “Ndërsa flasim, kolegët tanë në mbarë botën po i përgjigjen shpërthimeve të Ebolës në Republikën Demokratike të Kongos, lisë së majmunëve dhe hepatitit të një shkaku të panjohur dhe krizave komplekse humanitare në Afganistan, Etiopi, Somali, Sudanin e Jugut, Republikën Arabe Siriane, Ukrainë dhe Jemen.

OBSH tha më herët se një numër i rasteve të tjera të dyshuara të lisë së majmunëve po hetoheshin – pa përmendur vendet e përfshira dhe paralajmëroi se më shumë infeksione kishte të ngjarë të konfirmoheshin. Pasi shpërthimi u identifikua për herë të parë në Mbretërinë e Bashkuar, virusi filloi të zbulohej në të gjithë Europën me agjencitë e shëndetit publik në Spanjë, Portugali, Gjermani, Belgjikë, Francë, Holandë, Itali dhe Suedi të gjitha rastet që konfirmuan.

Raste të tjera u konfirmuan në Austri dhe Zvicër të dielën. Agjencia e Sigurisë Shëndetësore në Mbretërinë e Bashkuar ka identifikuar 20 raste deri më tani dhe këshilltarja e saj kryesore mjekësore Dr Susan Hopkins u shpreh se: “Ne po zbulojmë më shumë raste në baza ditore“. Ajo tha se virusi tani po përhapet në komunitet – me raste të zbuluara që nuk kanë pasur kontakt me askënd që ka vizituar Afrikën Perëndimore, ku sëmundja është endemike’.

Por rreziku për popullatën e përgjithshme mbetet “jashtëzakonisht i ulët”, me rastet e deritanishme të gjetura kryesisht në disa zona urbane dhe midis burrave homoseksualë ose biseksualë, tha Dr Hopkins. Megjithëse nuk ka një vaksinë specifike për linë e majmunëve, disa vende kanë thënë se po  grumbullojnë vaksina kundër lisë, të cilat janë rreth 85% efektive në parandalimin e infeksionit, sepse të dy viruset janë mjaft të ngjashëm.

Nuk është ende e qartë pse po ndodh tani ky shpërthim i papritur. Një mundësi është që virusi të ketë ndryshuar në një farë mënyre, megjithëse aktualisht ka pak prova që sugjerojnë se ky është një variant i ri. Një shpjegim tjetër është se virusi e ka gjetur veten në vendin e duhur në kohën e duhur për të lulëzuar. Gjithashtu, lija e majmunëve mund të përhapet më lehtë sesa në të kaluarën, kur vaksina kundër lisë ishte përdorur gjerësisht. BBC

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.