Pagesat për prodhuesit e energjisë – Enti Rregullator vendos çmimin, qeveria do i paguajë 8.5652 lekë/kWh

Enti Rregullator i Energjisë ka vendosur çmimin me të cilin qeveria do të blejë energjinë e prodhuar nga prodhuesit me përparësi të energjisë elektrike përgjatë vitit që vjen.

Sipas vendimit të ERE-s, çdo kWh i prodhuar do të blihet me 8.5652 lekë, ndërkohë që ky çmim nuk ka pësuar ndryshim në raport me vitin 2022. Gjatë mbledhjes së bordit u argumentuan aryset se ky çmimi nuk mund të jetë më i lartë, ndonëse çmimi në Bursën e Hungarisë sivjet ka qenë ndjeshëm më i lartë.

3 vjet më parë qeveria vendosi ndryshimin e bonusit për promovimin e burimeve të rinovueshme nga 1.3 në 1.2, një koeficient që është pjesë e metodologjisë mbi bazën e së cilës përllogaritet çmimi vjetor me të cilin hidrocentralet deri në 15 MW shesin energjinë elektrike.

Kjo solli edhe një rënie të çmimit në atë kohë, që u cilësua nga pordhuesit si goditje për investimet e kryera në këtë sektor. Gjithsesi, edhe këtë vit qeveria ka propozuar projektligjin “Për kontributin e solidaritetit”, që nënkupton taksim shtesë për një pjesë të pordhuesve të energjisë elektrike, që nga deputetët e opozitës është cilësuar si cenim i sigurisë juridike të kontratave.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.