Pakoja e Madhe, sa do të përfitojnë qytetarët – Gratë kryefamiljare dhe nëpunësit me paga nën 60 mijë lekë, do të marrin më shumë
Nga muaji janar rreth një milion shqiptarë do të përfitojnë një fond total prej 8 miliardë lekë nga buxheti i shtetit.
Njoftimi është publikuar një ditë më parë nga kryeministri Edi Rama, ndërkohë që ditën e sotme janë mësuar edhe disa detaje të tjera. Nga fondi i përgjithshëm më shumë do të përfitojnë gratë kryefamiljare dhe nëpunësit me paga nën 60 mijë lekë.
Këto dy kategori do të marrin secila nga 20 mijë lekë. Ndërkohë, nëpunësit me paga mbi 60 mijë lekë do të duhet të kënaqen “vetëm” me 10 mijë lekë.
Sipas të dhënave, nga 8 mijë lekë do të përfitojë çdo pensionist, një shifër e ulët kjo, pasi në të gjithë vendin vlerësohet të jenë 695 mijë të tillë.
Po ashtu, edhe rreth 71 mijë persona me aftësi të kufizuara pritet të marrin nga 8 mijë lekë. Qeveria synon në këtë rast të japë paratë direkt në dorë për të lehtësuar familjet shqiptare në kapërcimin e vështirësive ekonomike të krijuara nga rritja e fortë e çmimeve.
Dorian Koça / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.