Panele diellore për ministritë – Vetëprodhim i energjisë, borxhet e institucioneve ndaj OSHEE-së kanë arritur 5 miliardë lekë 

Në tarracat e kryeministrisë dhe ministrive të linjës do të instalohen panele fotovoltaike. Këshilli i Ministrave ka autorizuar Fondin Shqiptar të Zhvillimit, si organ qendror blerës dhe njësi zbatuese, për kryerjen e procedurës së prokurimit publik si dhe kryerjen e proceduarave për marrjen e lejeve përkatëse. Efektet financiare që vijnë nga ky vendim do të përballohen nga buxheti i miratuar për Fondin Shqiptar të Zhvillimit, për vitin 2022.

Kjo masë vjen pas aktit normativ të miratuar nga qeveria javën e kaluar, sipas të cilit çdo institucion shtetëror do të duhet të ulë konsumin e energjisë elektrike me 15%, krahasuar me një vit më parë. Vendimi u bë publik pas mbledhjes së qeverisë nga zëvendëskryeministrja dhe ministrja e Infrastrulkturës dhe Energjisë, Belinda Balluku, duke shtuar se çdo institucion do të mbikëqyret nga një administrator, i cili do të ketë synim të ulë konsumin e energjisë elektrike, ndërsa titullarët e tyre do të gjobiten me 50 mijë lekë nëse nuk arrijnë këtë target.

Reduktimi i faturave të energjisë elektrike do të ndikojë edhe në uljen e borxheve, që institucionet shtetërore kanë ndaj Operatorit të Shpërndarjes së Energjisë Elektrike. Sipas të dhënave të fundit të raportuara nga Enti Rregullator i Energjisë, në fund të muajit gusht borxhi i kësaj kategorie konsumatorësh arriti në gati 5 mld lekë, duke vijuar tendencën në rritje që nga viti 2015.

Kjo është vlera më e lartë e borxheve e akumuluar ndonjëherë nga institucionet shtetërore, të paktën që prej vitit 2009, kur faturat e papaguara të energjisë arrinin në 988 mln lekë apo rreth 5-fish më pak.

Ola Mitre / SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.