Paralajmërimi i 11 vendeve anëtare të BE – “Duhet kujdes në lehtësimin e rregullave për ndihmat shtetërore”

11 vende anëtare të Bashkimit Europian apeluan për shumë kujdes për sa i përket lehtësimit të rregullave për ndihmat shtetërore të bllokut prej 27 anëtarësh në mbështetje të industrisë së gjelbër në Europë. Sipas tyre ekziston rreziku i konkurrencës së brendshme brenda bllokut.

Dokumenti i cili daton në 10 shkurt, iu dërgua komisionit europian ekzekutiv të bllokut dhe u nënshkrua nga Danimarka, Finlanda, Irlanda, Polonia, Suedia, Holanda, Hungaria, Letonia, Republika Çeke, Sllovakia dhe Belgjika.

Komisioni propozoi lehtësimin e kufizimeve të BE-së për ndihmën shtetërore për investime në energjinë e rinovueshme ose industrinë e dekarbonizimit, pjesërisht në përgjigje të Aktit të SHBA-së për Reduktimin e Inflacionit. Megjithatë, nënshkruesit janë të shqetësuar për përfitimin e atyre me ‘xhepat më të thellë’ në bllokun 27-vendesh.

Sipas fragmenteve të dokumentit në fjalë të publikuar nga agjencia e lajmeve Reuters, ndihma shtetërore për prodhimin në shkallë të gjerë dhe aktivitetet tregtare mund të ketë efekte të rëndësishme negative, duke përfshirë fragmentimin e tregut të brendshëm, garat e dëmshme të subvencioneve dhe dobësimin e zhvillimit rajonal. Këto disavantazhe mund të tejkalojnë efektet pozitive.

Komisioni europian konfirmoi marrjen e letrës dhe u shpreh se synonte të miratonte rregulla të reja në javët e ardhshme “duke marrë parasysh reagimet e marra”.

11 vende i kërkuan Komisionit të shqyrtojë nëse politikat e tjera mund të arrijnë më mirë qëllimin e promovimit të investimeve të gjelbra, si dhe të analizojë tërësisht rreziqet përpara se të bëjë ndonjë “ndryshim themelor”. Sipas tyre rregullat e BE-së për ndihmën shtetërore duhet të hartohen duke marrë parasysh vlerën e shtuar në nivel të BE-së në tërësi. Këto rregulla për ndihmën shtetërore duhet të mbrojnë një fushë të barabartë loje në tregun e brendshëm të BE-së, shkruhej më tej.

Shefja e konkurrencës e BE-së, Margrethe Vestager, u shpreh këtë muaj se Franca dhe Gjermania – dy ekonomitë më të mëdha të bllokut – përbëjnë rreth 80% të ndihmës shtetërore të miratuar që kur komisioni njoftoi për herë të parë planet për të ndihmuar ekonomitë të përballojnë pandeminë COVID-19. Liderët e 27 vendeve të BE-së diskutuan këtë çështje në Bruksel javën e kaluar, duke shpresuar që të jenë në gjendje të zgjidhin mosmarrëveshjet e tyre mbi subvencionet përpara samitit të tyre të ardhshëm më 23-24 mars.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.