Pas ringritjes së shkurtër, euro përsëri nënçmim me lekun – Të premten monedha e përbashkët europiane në Shqipëri kthehet në vlera nën 116 lekë

Ndërsa në ditët e para të janarit nisi të jepte sinjale se po kthehej në raportet normale me lekun, Euro ka rënë ndjeshëm 3 ditët e fundit, duke ju kthyer nëncimit të fortë që pësoi ditët e fundit të vitit 2022. Sipas të dhënave zyrtare të Bankës së Shqipërisë, këtë të premte kursi mesatar i këmbimit për monedhën e përbashkët ra në vlerën 115.88 lekë.  Mesatarja e çmimit në blerje u raportua 115.57 lekë, ndërsa në shitje 116.18 lekë. Duhet kujtuar që nga data ditët e para të këtij viti, euro nisi të rikuperojë terren karshi lekut, duke arritur vlerën mesatare maksimale më 6 janar në vlerën 117.46. Gjë që gjithësesi zgjati vetëm një ditë       , pasi leku nisi menjeherë tendencën mbiçmumese për ta thelluar fort tre ditët e fundit.

Dobësia në raport me lekun vijon të shaqet në një moment që monedha e përbashkët evropiane po fiton terren në tregjet ndërkombëtare. Kjo falë ndërhyrjeve të forta të Bankës Qendrore Evropiane, e cila edhe pse me vonesë veproi me rritjen e normës bazë të interesit, plus lajmeve më pak pesimiste për ekonominë e eurozonës. Shkak tjetër i rëndësishëm është edhe ngadalësimi i rritjes së normave nga ana e Rezervës Federale, e cila e bën më pak tërheqës dollarin amerikan.

Sa i përket tregut të brendshëm, duket se volumi i monedhës evropiane që qarkullon në vend është ende i lartë, edhe me lehtësimin e efektit sezonal. Ndërkohë që një faktor plus është situata e mirë hidrike, e cila ka reduktuar blerjet e energjisë në bursat ndërkombëtare, shkak për të cilin Korporatës Elektronoenergjitike Shqiptare nuk i është dashur të sigurojë sasi të konsiderueshme eurosh në tregun e brendshëm.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.