Patronazhistët, Helsinki: Tronditëse, të zbardhen përgjegjësit – Rystemaj: Ligji s’parashikon dënime, vetëm gjoba deri 2 milionë lekë që nuk funksionojnë

Komiteti Shqiptar i Helsinkut vëren me shqetësim se nuk është përmbyllur ende hetimi I publikimit të pagave të rreth 700 mijë qytetarëve si dhe skandalit që tashmë njihet si ai i patronazhistëve. Në një tryezë të rrumbullakët të zhvilluar të enjten mbi publikimin e të dhënave personale, Kreu i Komitetit Erida Skëndaj e quajti tronditës publikimin e të dhënave, dhe tha se shteti duhet të veprojë për zbardhjen e përgjegjësve.

Disa nga gjetjet e raportit mbi këto ngjarje u paraqitën nga Jonida Rystemaj, Pedagoge, Fakulteti i Drejtësisë. Ajo tha se institucionet, ashtu si dhe legjislacioni shqiptar është i mangët në mbrojtjen e të dhënave personale të qytetarëve.

Ajo tha se ligji shqiptar nuk njeh penalitete për shkelësit përveç gjobave deri 1 milionë lekë për individët dhe 2 milionë lekë për subjektet, të cilat, nuk e arrijnë qëllimin.

Aurélien Juliard, nga Zyra e Politikave të Drejtësisë dhe Punëve të Brendshme, Delegacioni i Bashkimit Europian në Shqipëri i konsideroi gjithashtu shqetësuese episodet e publikimit të të dhënave personale të qytetarëve, duke nënvizuar se BE i ka rekomanduar Shqipërisë masa konkrete në këtë drejtim.

Gjatë vitit 2021 u regjistruan tre episode me publikimin e të dhënave personale të qytetarëve, mes të cilëve më shqetësuesi konsiderohet ai i patronazhistëve, të cilët kishin në përdorim një database të detajuar deri te preferencat politike të qytetarëve.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.