Përmbyllet java e detarisë – Firmoset marrëveshja për krijimin e një platforme monitorimi

Më 13, 14 dhe 15 qershor aktorët më të rëndësishëm vendas dhe të huaj të sektorit detar u bënë bashkë për të diskutuar mbi logjistikën dhe zinxhirët e furnizimit rajonal të transportit detar. Java detare është kthyer në një traditë të përvitshme, kësaj here nën sloganin “Së bashku për detarët”.
Kjo ngjarje e mbushur me aktivitete ka shërbyer si një platformë për të trajtuar aspekte të rëndësishme në lidhje me infrastrukturën portuale, lehtësimin e tregtisë, ndërgjegjësimin dhe mirëqenien e komunitetit detar.
Pjesëmarrja e Universitetit të Durrësit në këtë partneritet ka drejtuar fokusin edhe te punësimi i të rinjve në këtë sektor. Në port gjendej edhe tenda e hapur per panair pune dhe rekrutime.

Ilir Nezha, Kapiten i Rangut të tretë në anijen patrulluese “Iliria”, ndau për Televizionin Scan, Media Partner-in e kësaj ngjarje, informacione mbi atë çka duhet për të qenë pjesë e sektorit detar.

“Për të qenë pjesë e forcave detare mjafton të jetë arsimi i duhur, kënaqësia dhe një kërkesë aplikimi tek qendra e personelit të rekrutimit.”

Të qënit pjesë e forcave detare ka dhe vështirësi, por megjithatë tejkalohen me shumë profesionalizëm dhe përkushtim.
Sezoni turistik e shton prezencën në det, rrjedhimisht edhe përgjegjësia e forcave detare shtohet krahas saj.

Në tryezat e organizuara kanë qenë të pranishëm zyrtarë të shumtë. Kreu i Autoritetit Portual Durrës, Pirro Vengu, e konsideron këtë maratonë aktivitetesh shumë të rëndësishme.
Sipas tij, ky sektor mund transformohet në një motorr të zhvillimit ekonomik të vendit.
Sakaq, edhe zëvëndës kryeminstrja Belinda Balluku, theksoi se Shqipëria është vendi që mban portën e Korridorit të 8 si dhe të Korridorit Blu të cilët i japin rëndësi të veçantë.

Përmbyllja e kësaj Jave Detare, e cila tashmë vjen për të tretin vit, pasoi me një firmosje të marrëveshjes, e cila ka në fokus krijimin e një platforme digjitale për monitorimin në kohë reale të të gjithë statistikave të vëllimeve jo vetëm për Shqipërinë por edhe për rajonin.

Adelina Onuzi/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.