Portugalia, gati të përfundojë “vizat e arta” – Skema ka “tërhequr” 6,6 mld euro investime të huaja gjatë një dekade

Investimet përmes “vizës së artë” në Portugali, e cila u jep të huajve të drejtën e qëndrimit, u rritën me gati 50% muajin e kaluar, treguan të dhënat e fundit, ndërsa qeveria po shqyrton mundësinë e përfundimit të kësaj skeme të diskutueshme.

“Viza e artë” është kritikuar ashpër në vend për rritjen e çmimeve të banesave dhe qirave, ndërsa Komisioni Europian ka bërë thirrje për përfundimin e programeve të tilla kombëtare.

Në Portugali, kjo skemë ka tërhequr 6.6 miliardë euro investime gjatë dekadës së fundit, kryesisht nga Kina, Brazili dhe Turqia, ku pjesa më e madhe e parave shkon në pasuri të paluajtshme. Për të aplikuar, shtetasit jashtë BE duhet të bëjnë një investim të rëndësishëm në Portugali, si blerja e pasurive të paluajtshme. Më pas atyre u jepen të drejtat e qëndrimit dhe u lejohet udhëtimi pa viza në të gjithë zonën Shengen të Europës.

Por kryeministri Antonio Costa, deklaroi më 2 nëntor se qeveria e tij do të vlerësonte skemën 10-vjeçare, duke vënë në pikëpyetje nëse programi mund të vijontë.

Të dhënat zyrtare treguan se investimet përmes vizave të arta u rritën 48% në nëntor krahasuar me muajin paraardhës, në 65 milionë euro, ndërsa rritja vjetore këtë muaj ishte 41%.

Zyra portugeze e “Transparency International” ka deklaruar se programi mund të përdoret për pastrim parash, ndërsa Komisioni Europian i konsideron skema të tilla një rrezik potencial për sigurinë.

Britania hoqi “vizat e arta” në shkurt pas pushtimit rus të Ukrainës mes shqetësimeve për hyrjen e parave të paligjshme ruse, ndërsa Portugalia pezulloi “vizat e arta” për rusët, por 431 kishin përfituar tashmë nga skema që nga koha e fillimit të saj.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.