Presidenti i ri turk zgjidhet në balotazh – Asnjë nga kandidatët nuk mori më shumë se 50% të votave
Turqia shkon në balotazh pasi presidenti Tajip Erdogan udhëhoqi ndaj rivalit të tij opozitar Kemal Kilicdaroglu në zgjedhjet e së dielës, por nuk arriti një shumicë të plotë për të zgjatur sundimin e tij 20-vjeçar të vendit anëtar të NATO-s.
As Erdogan dhe as Kilicdaroglu nuk e kaluan pragun e 50% të nevojshëm për të shmangur një raund të dytë, që do të mbahet më 28 maj, në një zgjedhje që shihet si një sfidë në rrugën gjithnjë e më autoritare të Erdoganit.
Votimi presidencial do të vendosë jo vetëm se kush e udhëheq Turqinë, por edhe nëse ajo do të kthehet në një rrugë më laike, demokratike, si do të trajtojë krizën e saj të rëndë të kostos së jetesës dhe do të menaxhojë marrëdhëniet kyçe me Rusinë, Lindjen e Mesme dhe Perëndimin.
Kilicdaroglu, i cili tha se do të mbizotëronte në balotazh, u kërkoi mbështetësve të tij të ishin të durueshëm dhe akuzoi partinë e Erdoganit për ndërhyrje në numërimin dhe raportimin e rezultateve.
Por Erdogan performoi më mirë nga sa kishin parashikuar sondazhet parazgjedhore dhe ai u shfaq i sigurt dhe luftarak teksa iu drejtua mbështetësve të tij. Ai u shpreh se ishte përpara me 2.6 milionë vota dhe se priste që kjo shifër të rritet dhe më shumë. Me pothuajse 97% të kutive të numëruara, Erdogan kryesoi me 49.39% të votave dhe Kilicdaroglu kishte 44.92%, sipas agjencisë shtetërore të lajmeve Anadolu.
Bordi i Lartë Zgjedhor i Turqisë i dha Erdoganit 49.49% me 91.93% të numëruara të kutive të votimit. Rezultatet pasqyruan polarizimin e thellë në një vend në udhëkryq politik. Sondazhet para zgjedhjeve kishin treguar për një garë shumë të ngushtë, por i dhanë Kilicdaroglu, i cili kryeson një aleancë gjashtëpartiake, një epërsi të lehtë. Dy sondazhe të premten e treguan atë mbi pragun e 50%.
Vendi me 85 milionë banorë – tashmë duke luftuar me inflacionin në rritje – përballet me dy javë pasigurie që mund të tronditë tregjet, me analistët që presin pasoja në monedhën vendase dhe në tregun e aksioneve.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.