Prill, biznesi i rikthehet kredisë për nevoja afatshkurtra – Ndryshon tendenca, rritje e huasë më afat deri një vit kryesisht nga bizneset e mëdha

Pas një periudhë të gjatë në të cilën bizneset kishin përjetuar një situatë të mirë likuiditetesh, duke ju drejtuar pak bankave për hua afatshkurtëra, tendenca ka ndryshuar në prill. Sipas të dhënave të Bankës së Shqipërisë, kredia me afat deri në 12 muaj, është ndër të paktat portofole që ka shënuar rritje, në një kohë që huamarrja në total ka shënuar rënie të ritmeve. Nga 173,8 miliardë lekë në muajin mars të këtij viti, kredia deri në një vit është rritur në 176,2 miliardë lekë në prill.

Ndryshimi i tendecës vërehet edhe sa i përket segemnteve të biznesit. Ndërsa muajt e fundit biznesi i madh dhe i mesëm kishin ulur nevojën për kredi për shkak të situatës shumë të mirë të likuideve, situata ka ndryshuar në prill. Që të dy segmentet kanë rritur huamarrjen gjatë muajit prill.

Kushtet e përgjithshme të ofertës së kredisë patën një ecuri të diferencuar sipas agjentëve ekonomikë gjatë muajve të parë të vitit 2023. Bankat kanë rritur kujdesin në kredidhënie duke shtrënguar më tej standardet, si dhe kushtet e termat e kreditimit në kreditë e reja akorduar bizneseve.

Kujdesi i shtuar i bankave në kreditimin e biznesit prej më shumë sesa një vit, vijon të diktohet kryesisht nga rreziku i perceptuar prej tyre mbi aftësinë paguese të kredimarrësve, si dhe nga pasiguritë mbi perspektivën ekonomike, në prani të kostove të larta të prodhimit dhe furnizimit me lëndë të parë. Kushtet e termat e kreditimit u shtrënguan kryesisht nëpërmjet rritjes së marzheve mbi kreditë me rrezik, si dhe nëpërmjet përcaktimeve shtesë në marrëveshjet e kredisë nënshkruar me bizneset. Megjithatë, shkalla e kredive të refuzuara gjatë muajve të parë të këtij viti u raportua me një rënie të vogël në këtë tremujor, pas katër tremujorësh rritjeje.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.