Problemi i gazit, Europa pret një dimër të vështirë – Rritja e kërkesës nga Kina mund ta vështirësojë situatën
Europa ka bërë një punë të mirë për të reduktuar varësinë e saj nga nafta dhe gazi rus si dhe për të lehtësuar krizën energjetike të shkaktuar nga lufta në Ukrainë. Por pavarësisht kësaj ajo ende nuk ka dalë nga problemi, sipas kreut të Agjencisë Ndërkombëtare të Energjisë – IEA – Fatih Birol.
Ai theksoi se Europa arriti të transformojë tregun e energjisë, të zvogëlojë pjesën e gazit rus në konsum nën 4% dhe ekonomia e saj ende nuk është prekur nga recesioni. Emetimet e dëmshme europiane janë ulur dhe rezervat e gazit janë në një nivel shumë të mirë, shtoi Birol. Ai vlerësoi se vendet europiane bënë një punë të mirë dimrin e kaluar, edhe pse pjesërisht falë një moti më të butë se sa pritej.
Megjithatë, Birol paralajmëroi se tregu europian i energjisë duhet të kapërcejë tre pengesa të tjera të mëdha këtë vit – kërkesën në rritje të Kinës, falimentimin e mundshëm të SHBA-së dhe varësinë e saj ende aktuale nga eksportet ruse të energjisë.
Sipas tij vitin e kaluar oferta në tregun botëror të energjisë ishte e bollshme falë faktit se Kina mbylli fabrikat e saj dhe vendosi rregulla strikte për Covid-in, ndaj bleu më pak naftë dhe gaz për shkak të ngadalësimit të aktivitetit ekonomik. Megjithatë, ky nuk është më rasti dhe Europa mund të përballet me një dimër më sfidues këtë vit.
Kërkesa për gaz natyror të lëngshëm nga Kina pritet të rritet në gjysmën e dytë të vitit, tha Birol, duke shtuar se importet e gazit të vendit janë një “faktor kyç” për kërkesën në tregun e gazit natyror. Megjithatë, ai beson se çmimet e energjisë mund të jenë më të ulëta se sa pritej dhe ai nuk pret një “bum të madh” në importet kineze.
IEA parashikon që kërkesa globale për naftë do të rritet me më shumë se 2 milionë fuçi në ditë këtë vit, me Kinën, importuesja e dytë më e madhe e naftës në botë pas SHBA-së, përgjegjëse për pothuajse 60 për qind të kësaj rritjeje të kërkesës.
Eksportet e gazit nga gjigandi shtetëror rus i energjisë Gazprom në Zvicër dhe BE ranë me 55% në vitin 2022, sipas të dhënave të Gazprom të publikuara në janar. Birol vuri në dukje se nëse do të ketë një reduktim të mëtejshëm të importeve të gazit “për arsye politike”, Europa mund të përballet sërish me “disa sfida” në dimrin e ardhshëm. AI theksoi se G7 dhe vendet europiane nuk do të bëjnë më marrëveshje me Rusinë, duke thënë se historia e gazit rus ka “mbaruar”.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.