Prodhimi i naftës pritet të ulet – Vendet e OPEC+ pritet të vendosin shkurtimin e prodhimit me mbi 1 milion fuçi në ditë

OPEC+ do të konsiderojë një ulje të prodhimit të naftës prej më shumë se 1 milion fuçi në ditë këtë javë, në atë që do të ishte lëvizja më e madhe që nga pandemia Covid-19 për të adresuar dobësinë e tregut të naftës. Takimi do të zhvillohet më 5 tetor në sfondin e rënies së çmimeve të naftës dhe muajve të paqëndrueshmërisë së madhe të tregut, çka bëri që prodhuesi kryesor i OPEC+, Arabia Saudite, të deklarojë se grupi mund të ulë prodhimin.

OPEC+, i cili kombinon vendet e OPEC-ut dhe aleatët si Rusia, ka refuzuar të rrisë prodhimin për të ulur çmimet e naftës pavarësisht presionit nga konsumatorët kryesorë, përfshirë Shtetet e Bashkuara, për të ndihmuar ekonominë globale.

Çmimet megjithatë kanë rënë ndjeshëm në muajin e fundit për shkak të frikës për ekonominë globale dhe një rritje të dollarit amerikan pasi Rezerva Federale rriti normën bazë të interesit.

Një ulje e konsiderueshme e prodhimit pritet të kundërshtohet nga Shtetet e Bashkuara, të cilat kanë ushtruar presion mbi Arabinë Saudite që të vazhdojë të prodhojë më shumë për të ndihmuar që çmimet e naftës të zbuten më tej dhe të reduktojnë të ardhurat për Rusinë, ndërsa Perëndimi kërkon të ndëshkojë Moskën për pushtimin e Ukrainës. Arabia Saudite nuk i ka dënuar veprimet e Moskës në mes të marrëdhënieve të vështira me administratën e presidentit amerikan Joe Biden.

Javën e kaluar, një burim i njohur për lidhjet me Rusinë, tha se, Moska do të dëshironte që OPEC+ të ulte prodhimin me 1 milion fuçi në ditë, ose 1% të furnizimit global. Kjo do të ishte ulja më e madhe që nga viti 2020, kur OPEC+ uli prodhimin me një rekord prej 10 milionë fuçi në ditë pasi kërkesa u rrëzua për shkak të pandemisë Covid-19. Një burim tjetër tha se, shkurtimi I prodhimit mund të jetë mbi 1 milion fuçi, pas një reduktimi vullnetar shtesë nga Arabia Saudite.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.