Projeksionet/ Kriza po prodhon një “boom” të energjisë së rinovueshme – Brenda 5 viteve të ardhshëm pritet dyfishimi i tyre

Kapaciteti global i energjisë së rinovueshme do të dyfishohet gjatë pesë viteve të ardhshëm, nxitur nga shqetësimet për sigurinë energjetike si pasojë e pushtimit rus të Ukrainës. Deklarata u bë nga Agjencia Ndërkombëtare e Energjisë.

Në një raport vjetor mbi perspektivën për burimet e rinovueshme, agjencia sqaroi se kapaciteti në të gjithë botën pritet të rritet me 2.400 gigavat – i barabartë me gjithë kapacitetin e energjisë elektrike të Kinës sot – në 5.640 gigavat deri në vitin 2027.

Rritja është 30% më e lartë se sasia e parashikuar e rritjes një vit më parë. Çmimet e larta të gazit dhe energjisë elektrike nga kriza globale e energjisë këtë vit, i kanë bërë më tërheqëse teknologjitë e energjisë së rinovueshme. Rritja e burimeve të rinovueshme po nxitet dhe nga Shtetet e Bashkuara të Amerikës, Kina dhe India që zbatojnë politika dhe reforma të tregut për të mbështetur vendosjen e burimeve të rinovueshme më shpejt se sa ishte planifikuar më parë.

Drejtori ekzekutiv i Agjencisë Ndërkombëtare të Energjisë, Fatih Birol, u shpreh se burimet e rinovueshme po zgjerohen me shpejtësi. Por sipas tij kriza globale e energjisë i ka futur ato në një fazë të re të jashtëzakonshme të rritjes dhe më të shpejtë e bota, theksoi ai, është e vendosur të shtojë po aq energji të rinovueshme në pesë vitet e ardhshme sa ka shtuar në 20 vitet e mëparshme.

Në raport thuhet se burimet e rinovueshme do të përbëjnë mbi 90% të zgjerimit global të energjisë elektrike gjatë pesë viteve të ardhshme duke lënë pas përdorimin e qymyrit, për t’u bërë burimi më i madh i energjisë elektrike globale deri në fillim të vitit 2025.

Kapaciteti global fotovoltaik diellor është vendosur të trefishohet pothuajse deri në vitin 2027, duke u bërë burimi më i madh i kapacitetit të energjisë në botë. Ndërsa kërkesa për biokarburantet është vendosur të rritet me 22% deri në vitin 2027, sipas raportit.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.