Propozohet  “Moratorium” për koncesionet – Tabaku kërkon ngrirje kontratash. Braçe e mbështet. Por komisioni e lë evazive

Brenda këtij vitit rregullat e lidhjes së kontratave koncesionare dhe përzgjedhjes së operatorëve  do të ndryshojnë tërësisht. Komisioni Ekonomisë ka diskutuar propozimin e deputetes demokrate Jorida Tabaku, për disa ndyrshime në ligjin “për koncesionet dhe partneritetin publik privat”, ku kërkohet më shumë transparencë në dokumentacion për kompanitë që marrin pjesë në tender, mbajtje e përgjegjësie për abuzime nga punonjësit publikë, detyrimin e dorëzimit të raportit financiar që vërteton burimet financiare të kompanisë deri në 50 për qind të vlerës së investimit, si dhe vendosje rregullash strikte që kanë për qëllim shkualifikimin e kompanive me precedentë penale.

“Të skualifikohen kompanitë që kanë precedentë penale, të mos ketë pjesëmarrje kur kompanitë kanë precedentë për korrupsion, falsifikim, etj. Kur operatori ekonomik është në proces gjyqësor. Dhe ata që s’kanë paguar kontratat, për të cilat vazhdojnë pagesat edhe pse s’kanë kryer shërbimin e saj”, është shprehur Jorida Tabaku, Deputete e PD.

Në përgjigje të këtyre propozimeve, Ministria e Financave shprehet se në të njëjtën linjë po punohet mbi ndryshimet ligjore në ligjin për koncesionet dhe pritet që të finalizohet në fund të vitit.

Por kaq ka mjaftuar që deputetët të kërkojnë bllokim të rinovimit të kontratave apo lidhjes së kontratave të reja deri në miratimin e këtij ligji. Erion Braçe, Deputet i PS

“Për mua problem është koha. S’mund te jepen kontrata tani ndërkohë qe ne fund te vitit do ndryshojmë rregullat. Pse unë te privilegjohem tani ndërkohë qe ne fund te vitit dikush tjetër do konkurroje me rregulla te tjera. Propozimet e zonjës Tabaku, qëndrojnë”, u shpreh Erion Braçe, Deputet i PS.

Komisioni nuk ka marrë një vendim nëse do të procedohet me miratimin e propozimeve të deputetes demokrate apo do të pritet drafti i plotë i Financave si dhe është lënë evazive se çfarë do të ndodhë me kontratat e parashikuara deri në fund të vitit.

Elisabeta Dosku / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.