Pse kërkesa globale për naftë pritet të arrijë nivelin e saj më të lartë ndonjëherë pas rihapjes së Kinës?!

Kërkesa globale për naftë pritet të arrijë nivelin e saj më të lartë ndonjëherë këtë vit për shkak të rihapjes së shpejtë të ekonomisë së Kinës. Kërkesa për naftë mund të rritet me 1.9 milionë fuçi në ditë për të arritur një rekord prej 101.7 milionë fuçi në ditë, tha Agjencia Ndërkombëtare e Energjisë në raportin e saj të fundit mujor, të publikuar të mërkurën.

Pekini filloi të çmontojë politikën e tij të rreptë zero-Covid në dhjetor, duke i hapur rrugën një rikthimi në aktivitetin e udhëtimit, tregtisë dhe biznesit në të gjithë ekonominë e dytë më të madhe në botë. Shumica e ekonomistëve presin që rritja të mbetet e ngadaltë në tremujorin e parë të 2023 përpara se të rritet gjatë pjesës tjetër të vitit.

Rritja e kërkesës kineze mund të çojë në një treg më të shtrënguar global të naftës pasi “ndikimi i plotë” i sanksioneve perëndimore mbi naftën ruse fillon të kafshojë, tha IEA në raport.

Agjencia me seli në Paris tha se eksportet e naftës nga Rusia ranë mesatarisht me 200,000 fuçi në ditë në dhjetor nga muaji i kaluar pasi Bashkimi Europian vendosi një ndalim për importet e naftës së papërpunuar të Moskës dhe vendet e G7 vendosën një kufi në çmimin me të cilin karburanti mund të tregtohen.

Çmimet e naftës së papërpunuar Brent, pikë referimi globale, ranë vitin e kaluar pasi arritën nivelin më të lartë të 14 viteve prej 139 dollarë për fuçi në fillim të marsit, pasi Rusia pushtoi Ukrainën. Çmimet filluan të rikuperohen në fillim të dhjetorit dhe u rritën me 1.7% të mërkurën për të arritur në 87 dollarë për fuçi.

Ku mund të shkojnë çmimet më pas është e paqartë. IEA tha se kishte një “shkallë të lartë pasigurie” mbi perspektivën e saj. Pavarësisht rënies së pritshme të furnizimit nga Rusia, inventarët globalë të naftës janë në nivelet e tyre më të larta që nga tetori 2021.

Një bum i kërkesës për automjete elektrike dhe përpjekjet e vendeve për t’u bërë më efikase në energji mund të ndihmojnë gjithashtu në zbutjen e kërkesës, tha agjencia. Parashikimet e IEA vijnë pasi udhëheqësit e biznesit shprehin optimizëm të kujdesshëm se bota mund të shmangë një recesion në vitin 2023, pas muajsh parashikimesh të zymta për perspektivën ekonomike.

Kjo në masë të madhe falë Kinës, rihapja e së cilës pritet të lëshojë një valë shpenzimesh që mund të kompensojë dobësinë ekonomike në Shtetet e Bashkuara dhe Europë. Në fillim të këtij muaji, Fondi Monetar Ndërkombëtar tha se rreth një e treta e ekonomisë botërore këtë vit ka të ngjarë të bjerë në recesion të përcaktuar zakonisht si dy ose më shumë tremujorë radhazi të rritjes në rënie.

Në nëntor, Organizata e Vendeve Eksportuese të Naftës dhe aleatët e saj filluan të ulin prodhimin e tyre të naftës me 2 milionë fuçi në ditë, një politikë e vendosur të vazhdojë deri në vitin 2023, pasi parashikonte një rënie të kërkesës.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.