Publikohen ankandet e bonove, lajm i mirë për individët – Pritej ulje, por në tetor-dhjetor qeveria do emetojë 830 milionë dollarë në tregun e brendshëm

Ndërsa Qeveria parashikonte uljen e nivelit të huamarrjes së brendshme për pjesën e mbetur të vitit për shkak të nivelit të lartë të të ardhurave, duket se e kundërta ka ndodhur duke ju referuar parashikimeve për emetime bonosh thesari e obligacionesh për periudhën tetor, nëntor, dhjetor. Ministria e Financave ka publikuar Kalendarin e Emetimeve të Titujve Qeveritarë në Tregun e Brendshëm Tremujori katërt 2022. Për të tre muajt janë parashikuar nga shtatë ankande, me një vlerë totale prej 83.5 miliardë lekësh, apo afërsisht 830 milionë dollarësh.

Sipas kalendarit, 31 miliardë do të emetohen në tetor, 29 miliardë në nëntor dhe 23.5 miliardë në dhjetor. Ankandet do të dominohen nga emetimet e bonove të thesarit 12 mujore.

Numra që janë lajm i mirë për të gjithë ata qytetarë që ndjekin tregun e letrave me vlerë të Qeverisë për të investuar kursimet. Rënia e kërkesës së Qeverisë për borxh të brendshëm do të ulte edhe normat e interesit të letrave me vlerë, të cilat janë rritur me ritme të kënaqshme muajt e fundit.

Për shkak të rritjes së normës bazë të interesit nga ana e Bankës së Shqipërisë dhe inflacionit, tregu i bonove të thesarit e obligacioneve ka ofruar norma të kënaqshme fitimesh muajt e fundit, ashtu si edhe normat e interesit që ofrojnë bankat për të tërhequr depozita të reja.

Sipas të dhënave të Bankës së Shqipërisë, normat e fitimit të letrave me vlerë të qeverisë kanë ndjekur ecuri rritëse që prej muajit mars, të diktuar nga rritjet e normës bazë dhe pritjet e tregut për normalizim të shpejtë të politikës monetare në përgjigje të inflacionit të lartë.

Në ankandin e fundit, yield-i i bonove me afat maturimi 12-mujor shënoi 2.84%, duke regjistruar një rritje prej 0.8 pikë përqindje nga muaji prill. Rritje të ngjashme kanë shënuar edhe yield-et e obligacioneve 5 dhe 7-vjeçare, ndërkohë që yield-et në maturitet e tjera qëndrojnë 0.3-0.5 pikë përqindje më lart se në muajin prill. Pritet që letrat me vlerë të qeverisë të vijojnë rritje të mëtejshme, për shkak të rritjes së normës bazë të interesit nga ana e Bankës së Shqipërisë, ndërkohë që bankat tregtare të vijojnë të tregojnë pak interes për to.

Lajmi i keq në këtë treg erdhi nga rënia e kërkesës për borxh të Qeverisë, që pret ta mbyllë vitin me një total prej rreth 400 milionë dollarësh shtesë në zërin e të ardhurave për shkak të rritjes së çmimeve. Kjo do të thoshte se Qeveria mund të pakësonte huamarrjen e brendëshme me rreth 170 milionë dollarë.

Kjo ulje e borxhit të brendshëm, pritej të ulte presionin për rritjen e mëtejshme të interesave të letrave me vlerë të qeverisë, por duke parë kalendarin e fundvitit, individët do të gezojnë norma të kënaqshme fitimesh për periudhën tetor-dhjetor.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.