Qeveria gjermane, 93.39 mln euro për Shqipërinë – Fokus i bashkëpunimit 2025-2026, zhvillimi i sektorëve prioritarë

Ernilda Luzi/ Scan

 

Në Berlin është nënshkruar Protokolli i Bashkëpunimit me Gjermaninë për vitet 2025-2026, me fokus në fushën e bashkëpunimit ekonomik dhe në zhvillimin e sektorëve prioritarë të qeverisë shqiptare.

Sipas njoftimit zyrtar nga Ambasada gjermane në Tiranë thuhet se ky protokoll parashikon një mbështetje financiare për qeverinë shqiptare në vlerën prej 93.39 milionë euro (nga këto 33.39 milionë € grante, 60 milionë € kredi me interes të ulët).

Mbështetja financiare do të jetë për një gamë të gjerë sekorësh si në: energji, zhvillimin e qëndrueshëm ekonomik, arsimin profesional, bujqësinë, si dhe mbështetjen në procesin e anëtarësimit të Shqipërisë në BE.

Ambasada gjermane në Tiranë thekson se me nënshkrimin e këtij protokolli është  hedhur një tjetër gur kilometrik në bashkëpunimin tonë 36-vjeçar gjermano-shqiptar.

“Pas 2,5 ditësh bisedimesh dhe negociatash intensive, drejtuesit e delegacioneve, përbërë secila prej rreth 10 anëtarësh, nënshkruan sot një plan të përbashkët pune për vitet 2025/2026 në fushën e bashkëpunimit ekonomik”, thuhet në njoftim.

Ndërkaq, Ambasada gjermane u shpreh se në këto kohë të vështira dhe me buxhete të kufizuara, Gjermania ka rritur mbështetjen e saj për Shqipërinë në krahasim me vitet e shkuara.

Me këtë duam të japim një mesazh të qartë: Ne vlerësojmë përparimet në reforma të vendit dhe i qëndrojmë në krah partnerëve tanë me vlerë në procesin e anëtarësimit në BE!

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.