Qeveria Meloni votëbesohet në parlament – “Synojmë t’i japim vendit një të ardhme me më shumë liri, drejtësi, mirëqenie e siguri”

Në orët e para të së mërkurës qeveria e re e Italisë e kryesuar nga Giorgia Meloni ka marrë votëbesimin e 235 parlamentarëve në Dhomën e Deputetëve. Pa fshehur vështirësitë me të cilat duhet të përballet, duke filluar nga emergjenca me çmimet e larta të energjisë, pasi sipas saj, Italia është “një anije në mes të stuhisë”. Por, Meloni siguron se, është në krye të një “ekuipazhi të aftë” dhe do të bëjë gjithçka mundet, edhe me çmimin e “mos rizgjedhjes”, për ta sjellë anijen të sigurt në port.

Ajo është kryeministrja e parë femër, në krye të një partie të djathtë që doli e para në zgjedhje dhe tani i ka numrat dhe dëshiron të drejtojë për 5 vitet e ardhshme. Meloni synon t’i japë vendit, me receta të qarta dhe një ndryshim politikash, nga organet tatimore, te covid, te emigrantët dhe mbështetje për më të dobëtit duke rishikuar të ardhurat nga shtetësia, “një të ardhme me më shumë liri, drejtësi, mirëqenie dhe siguri”.

Meloni e kupton se duhet të kapërcejë “paragjykimet” me të cilat shihet qeveria e saj edhe jashtë vendit. Dhe nuk është rastësi që ajo së pari siguron se Italia është pozicionuar fort me Perëndimin, kundër luftës së Putinit në Ukrainë, plotësisht brenda aleancës Atlantike. “Liria, deklaroi ajo, ka një kosto”.

“Për ne, Bashkimi Europian është shtëpia e përbashkët e popujve europianë dhe si i tillë duhet të jetë në gjendje të përballojë sfidat e mëdha të kohës sonë, duke filluar nga ato që shtetet anëtare vështirë se mund t’i përballojnë të vetme. Unë mendoj për marrëveshjet tregtare, por edhe për furnizimin me lëndë të parë dhe energji, për politikat e migracionit, për zgjedhjet gjeopolitike, për luftën kundër terrorizmit. Sfida të mëdha, për të cilat Bashkimi Europian nuk ka qenë gjithmonë i gatshëm”, deklaroi Meloni.

Ditën e sotme qeveria e re italiane pritet të marrë edhe votëbesimin nga Senati.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.