Qeveria nuk ka fonde për menaxhimin e mbetjeve! – Shqipëria, larg direktivave europiane për mbrojtjen e mjedisit

Menaxhimi i mbetjeve në vendin tonë do të jetë një sfidë edhe për 3-vjecarin e ardhshëm pasi vet qeveria pranon se ka mungesë fondesh për këtë sektor. “Në kuadër të përmbushjes së kërkesave për përafrimin dhe zbatimin e legjislacionit janë identifikuar mungesë fondesh për të ngritur sistemin e plotë të menaxhimit të mbetjeve (kosha, makina teknologjike, landfill-et sanitare) në të gjithë zonat e mbetjeve.” -thuhet në raportin e përgatitur për integrimin europian.

 Si sfidë paraqitet mbyllja e venddepozitimeve të shumta jashtë standarteve. Ndarja në burim e rrymave të mbetjeve dhe instrumenteve ekonomike për të promovuar riciklimin dhe ripërdorimin dhe për të parandaluar gjenerimin e mbetjeve mbeten të kufizuara. Në kuadër të përmbushjes së kërkesave për përafrimin dhe zbatimin e legjislacionit, janë identifikuar mungesa nga kuadri ligjor kombëtar për të rregulluar sistemin e menaxhimit të mbetjeve lidhur me Përgjegjësitë e Zgjeruara të Prodhuesit.

Më tej në raport citohet se ndikimi në mjedis, për Shqipërinë është një çështje e pazgjidhur duke e renditur vendin tonë larg direktivave europaine. Sektorët e ndryshëm që lidhen me mjedisin kanë problematika të cilat nuk kanë arritur normat pozitive. Transpozimi mbetet në nivel fillestar me 12%.

Një tjetër prioritet është dhe reduktimi deri në zhdukje e plastikës njëpërdorimshme ndërsa në fushën e cilësisë së ajrit vazhdon të mbetet forcimi i bashkëpunimit me institucionet përgjegjëse me qëllim zbatimin e planit kombëtar të cilësisë së ajrit.

Progres raporti rendit të  nevojshme përafrimin e legjislacionit me asquis sigurimin e një buxheti të përshtatshëm, forcimin e kapaciteteve të monitorimit dhe raportimit të agjencisë së mjedisit.

Marinela Lina / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.