Qeveria planifikon të marrë më shumë borxh të brendshëm – Nuk përjashtohet emetimi i një Eurobondi të ri në 2023

Vitin e ardhshëm qeveria ka planifikuar të marrë më shumë borxh në tregun e brendshëm sesa në atë të jashtëm. Kjo parashikohet në projektbuxhetin e vitit 2023, ku evidentohet se referuar parashikimeve të rritjes ekonomike, si edhe deficitit buxhetor të planifikuar për vitin 2023, niveli i borxhit publik në raport me PBB parashikohet të ulet me rreth 1.3 pikë përqindje krahasuar me nivelin e fundit të vitit 2022.

“Huamarrja e brendshme planifikohet të jetë më e lartë se huamarrja që pritet të realizohet në vitin 2022 dhe huamarrja e re mendohet të vijojë të realizohet kryesisht nëpërmjet titujve shtetërorë afatgjatë në përputhje me objektivat për reduktimin e risqeve, por gjithashtu duke ju përshtatur edhe preferencave të investitorëve për titujt. Huamarrja e huaj do të realizohet nëpërmjet disbursimit të huave që financojnë ecurinë e zbatimit të projekteve prioritare të qeverisë.

Gjithashtu, pritet të ketë edhe disbursime të huave në formën e mbështetjes buxhetore nga kreditorë multilateral, në kuadër të mbështetjes së reformave të qeverisë, si dhe emetimi i një instrumenti Eurobond në tregjet e kapitalit, nëse tregjet do të jenë të favoshme për të siguruar financim me një normë interesi në nivele të pranueshme” shkruhet në relacionin e projekt-buxhetit. Pritshmëritë janë që vitin e ardhshëm të ketë një rritje të mëtejshme të normave të interesit si në tregun e brendshëm, ashtu dhe në atë të jashtëm,çka do të sjellë si rrjedhojë edhe një shtrenjtim të borxhit të Shqipërisë.

Ndërkohë për sa i përket shpenzimeve për interesa të borxhit, gjatë vitit 2023 parashikohet një rritje e tyre me rreth 15 mld Lekë kryesisht për shkak të rritjes së konsiderueshme të normave të interesit në tregun e brendshëm dhe atë të huaj.

Për sa i përket ripagesave të borxhit të jashtëm, në vitin 2023 planifikohet që në rast se tregjet do të jenë të favorshme, të mundësohet së bashku me emetimin e një Eurobondi të ri, edhe maturimi i pjesshëm (blerje) i Eurobondit që maturohet në vitin 2025, me qëllim zbutjen e profilit të amortizimit të borxhit të jashtëm për vitin

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.