Qeveria rikthen Tatimin e Jashtëzakonshëm për “big-”et e energjisë! Taksa e re prek Kurum, Statkraft dhe AYEN

Qeveria shqiptare rikthen Tatimin e jashtëzakonshëm, një praktikë që ndiqet në raste të veçanta. Të parët që do t’i nënshtrohen këtij vendimi do të jenë 3 prodhuesit më të mëdhenj të energjisë në vend.

Kjo u bë e ditur nga kryeministri Edi Rama, në daljen e përbashkët për median me Drejtuesen e Komisionit Europian, Ursula Von Der Leyen që vizitoi Shqipërinë. Kryeministri saktësoi se kjo taksë nuk do të prekë të gjithë hidrocentralet por vetëm prodhuesit e mëdhenj dhe të ardhurat që arkëtohen do të përdoren për të mbështetur ata që janë më në nevojë.

“Do ndjekim direktivën europiane, duke parë çfarë kanë bërë disa vende. Do ju lutesha të jeni korrekt  me publikun e mos të flisni për taksë mbi të gjitha Hecet. Është për 3 prodhuesit e mëdhenj të energjië që nuk kanë bërë asgjë për ta shitur energjinë me shumë fish. S’kemi asgjë me ta por nuk mund të nxjerrin fitime marramendëse se u ra fati dhe ne të mos kemi mundësi që të mbështesim ata që janë më në nevojë” tha Rama.

Referuar të dhënave të SCAN, 3 prodhuesit e mëdhenj të energjisë në Shqipëri janë kompanitë Kurum, Statkraft- Devolli Hydropoëer dhe Ayen Energy.

Kurum International ka në pronësi 4 hidrocentrale të rëndësishme të vendit, Ulzë, Shkopet dhe Bistrica 1 dhe 2. Kompania ‘Ayen AS Energy’ ka në pronësi hidrocentralin e Peshqeshit dhe Fangut ndërsa Statkraft-Devolli Hydropower ka në pronësi 2 hidrocentrale, atë të Banjës dhe të Moglicës.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.