Qeveria shqiptare tërhiqet nga rritja e çmimit të energjisë për fashën mbi 800 kw. Shiu ‘shpëton’ familjet shqiptare nga shtrenjtimi i faturës
Qeveria shqiptare është tërhequr nga aplikimi i vendimit për të tarifuar me çmim real ata që konsumojmë më shumë se 800 kilovatë energji elektrike në muaj. Vendimi u njoftua nga kryeministri.; ai tha se ndikim në këtë vendim ka të bëjë fakti se ditët e fundit ka pasur reshje që kanë ndikuar në nivelin e prodhimit të energjisë elekttrike në vend.
Shtrenjtimi i energjisë elektrike për ata që konsumojnë më shumë se 800 kilovatë në muaj ka marrë edhe miratimin e Entit Rregullator të Energjisë pak ditë më parë. Vendimi përcaktonte se duke nisur nga data 1 tetor, ato familje që shpenzojnë më shumë do të faturohen me 42 lekë për kilovat, pa TVSH.
Kjo rritje u argumentua me faktin se Koorporata Elektroenergjetike Shqiptare po e blen energjinë më shtrenjtë si rrjedhojë e shtrenjtimit në tregjet ndërkombëtare. Parashikimet ishin që kjo lëvizje të ketë si efekt financiar një vlerë prej 1.8 miliardë lekësh.
Ky vendim konsiderohet i përkohshëm pasi do të ketë kohëzgjatje deri në 31 dhjetor të këtij viti. Kjo do të thotë se për faturimin e vitit të ardhshëm, do të duhet të realizohet edhe një mbledhje tjetër.
Sipas dokumentit të depozituar në ERE, në muajin tetor, numri i abonentëve që parashikohet të preken nga rritja e çmimeve të energjisë elektrike është 49 334, ndërkohë që në muajt nëntor dhe dhjetor ky numër familjesh rritet në 71 278.
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.