Rama dhe Balluku inspektojnë punimet në tunelin e Llogarasë!

Kryeministri Edi Rama ishte sot në Vlorë, së bashku me Zv/Kryeministren dhe Ministren e Infrastrukturës dhe Energjisë Belinda Balluku për të parë nga afër ecurinë e deritanishme të punimeve, kur tashmë ka përfunduar procesi i gërmimit në tunelin kryesor prej 5.99 kilometrash, ndërkohë që krahas tij do të jetë edhe një tunel emergjence me gjatësi 6.04 km.

Sipas njoftimit për media tuneli kryesor do të jetë i veshur me beton dhe i pajisur me sistemet komplekse të drenazhimit, ventilimit, mbrojtjes kundër zjarrit dhe tymrave, ndriçimit, thirrjeve të emergjencës dhe sinjalistikës. Gjithashtu tuneli është i pajisur në secilën anë me trotuare 1.17 m të gjerë. Tuneli kryesor është 7.70 m i gjerë dhe 4.70 m i lartë, si dhe i pajisur me sistem ajrimi, si dhe me një sistem të kullimit të urave nëntokësore dhe atyre sipërfaqësore. Përgjatë tunelit të trafikut ka 11 kalime lidhëse tërthore me tunelin e emergjencës, 5 janë për mjetet dhe 6 për këmbësorët.

“Pavarësisht se kemi hasur dhe këtu disa probleme gjeologjike momentet e fundit për sa i përket një kaverne e cila ka pasur një gjatësi 25 m dhe 30 metra në tavan. Megjithatë janë ezauruar  të gjitha problemet dhe tashmë sot kemi perden e fundit për të hedhur dhe për tu hapur tuneli,” theksoi Balluku.

Sipas saj aktualisht nga ana tjetër e tunelit kryesor ka nisur armatimi i betonit diku te 680 metra dhe lartësia e tunelit kryesor është 4. 7 m ndërkohë që gjerësia e gjithë rrugës 7.7 m. 1.7 m janë të vendosura si trotuar për të gjitha rastet e emergjencës siç parashikohet në kodin e sigurisë. “Kështu që pjesa tjetër, pra 6 m, do të jenë në dispozicion për tu përdorur nga automjetet, pra dy korsitë plus korsinë e shpejtësisë,” detajoi Ministrja Balluku e cila shtoi se synimi është që vepra te dorëzohet ne verën e vitit te ardhshëm.

“Ne do e dorëzojmë veprën në 10 gusht 2024. Nuk duam të zotohemi sepse veprat infrastrukturore kanë gjithmonë të papritura. Synimi ynë është që në sezonin e 2024, pra 1 qershorin e 2024 e gjithë vepra, pra 7. 4 km sepse 6 km është tuneli dhe 1. 4 janë rrugët ndihmëse dhe lidhëse, urat që do të lidhen direkt me pjesën e Palasës të jene gati në 1 qershor dhe operative për qytetarët”,  u shpreh ajo.

Edel Strazimiri / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.