“Raportoni për kontratat e tenderëve” – APP, institucioneve shtetërore: Zbatoni detyrimin ligjor për ecurinë e zbatimit 

Agjencia e Prokurimit Publik iu kërkon institucioneve të raportojnë mbi ecurinë e zbatimit të kontratave, si dhe të dërgojnë formularin e raportimit përfundimtar, brenda 30 ditëve nga përfundimi i saj.

Përmes një shkrese dërguar autoriteteve kontrakotore, APP sjell në vëmendje se ky është një detyrim ligjor dhe se duhet të zbatohet me rigorozitet. Në funskion të zbatimit të këtij detyrimi, më herët ky dikaster nxorri udhëzimin përkatës, si dhe formatin standard që duhet të përdoret për kontratat e lidhura për punë, mallra apo shërbime.

Në këtë formular parashikohen 2 raste të raportimit: Raportimi i ndërmjetëm, gjatë fazës së zbatimit dhe raportimi përmbledhës në përfundim të zbatimit të saj. Sipas udhëzimit, gjatë zbatimit të kontratës, personi ose strukturat e ngarkuara për ndjekjen e kontratës përgatisin një raport të ndërmjetëm sa herë evidentohen situata dhe problematika të ndryshme, që ndikojnë në zbatimin e saj sipas termave dhe kushteve të parashikuara në dokument.

Situata të tilla mund të jenë modifikimet e kontratës, ndërpreja, përfundimi apo shpallja e pavlefshme e saj, si dhe arsyet përkatëse se përse janë bërë këto ndryshime. Udhëzim i APP-së erdhi pas atij të muajit shtator të vitit të kaluar, që theksonte se institucionet shtetërore nuk mund të ndryshojnë kushtet e kontratave nga ato të përshkruara në dokumentet e tenderit dhe në ofertën fituese.

Për këtë arsye u kërkua hartimi i planit të zbatimit të kontratës pas çdo tenderi të realizuar për punë, mallra apo shërbime. Udhëzimi bazohej në ligjin e ri “Për prokurimin publik”, ndërkohë që nuk kanë munguar rastet kur autoritetet kontraktore kanë parashikuar të tjera kushte në kontratë, nga ato të parashikuara në garat tenderuese.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.