Resortet e skive në Austri, miliona euro shpenzime – Çmimi i lartë i energjisë “gjunjëzon” sektorin në prag sezoni
Në resortin e skive me famë botërore të Austrisë, në Kitzbuhel, bora artificiale po përdoret me shumicë për të krijuar idenë e nisjes së sezonit turistik dimëror, në një moment që parashikohet një rritje e madhe e faturave të energjisë. Në mes të krizës energjetike, kontratat e lira të energjisë elektrike të resorteve austriake të skive janë pezulluar.
Menaxherët shprehen se presin që kostot e energjisë të dyfishohen në këtë sezon, gjë që përkthehet në miliona euro shpenzime plus. Dhe në këtë rast rritja do iu faturohet klientëve.
Për ata që kanë programuar tashmë pushimet e tyre në këto rezorte ky është një lajm jo i mirë, dhe jo pak prej tyre shprehen se mund të mos jenë në gjendje të frekuentojnë vendet e tyre të preferuara aq shpesh sa zakonisht. Aktualisht gjithcka është bërë rreth 20 – 30% e shtrenjtë dhe cmimet pritet të rriten dhe më shumë duke e bërë skijimin të papërballueshëm për një pjesë të mirë të njerëzve.
Skijimi në Austri është pjesë kryesore dhe shumë e rëndësishme e sektorit të turizmit dimëror, duke përbërë 3.9% të PBB-së kombëtare të vendit. Resortet në të gjithë rajonin alpin po përpiqen të mbeten optimiste, por dimrat gjithnjë e më të ngrohtë nuk ndikojnë mirë në këtë industri. Sipas qendrës kombëtare meteorologjike të Austrisë, kohëzgjatja mesatare e mbulesës së borës në vend është ulur me 40 ditë që nga viti 1961.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.