Rindërtimi kërkon më shumë fonde – Ndryshon buxheti, shtohen 106 milionë euro, por ulet fondi për pagat

Në mbyllje të vitit, qeveria ka vendosur të ndryshojë sërish buxhetin e shtetit. Referuar aktit normativ, që mban datën 1 Dhjetor 2022, të ardhurat buxhetore dhe shpenzimet rriten respektivisht me 5 miliardë lekë krahasuar me aktin normativ të miratuar në muajin korrik, ndërsa defiçiti buxhetor mbetet i pa ndryshuar në 83.8 miliardë lekë. Por çfarë ndryshon konkretisht?

Është venbdosur që të rritet fondi për procesin e rindërtimit nga 20 miliardë lekë të parashikuar në buxhetin fillestar, në 32.4 miliardë lekë.

Më këtë fond parashikohet likujdimi i faturave për ato projekte të rindërtimit ku procesi ka pasur ecuri të shpejtë.

Në aktin normativ ulet fondi për politika të reja pagash nga 1,9 miliardë lekë që parashikohej në aktin e muajit korrik arrin në 1,2 miliardë lekë. Ndërsa shfuqizohet fondi për shpronësimet e parashikuar me vlerë 3 miliardë lekë. Referuar ndryshimeve në buxhet,pushteti vendor do të marrë 1 miliardë lekë si transfertë specifike, e cila shpërndahet tek 61 bahskitë dhe përdoret për shlyerjen e detyrimeve të prapambetura.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.