“Rishikojmë taksën për kompanitë e energjisë” – Qeveria Meloni votëbesohet në Senat: Do të rrisim tavanin e përdorimit të parasë cash

Italia duhet të rishikojë taksën e përkohshme për kompanitë e energjisë që kanë përfituar nga rritja e çmimeve të naftës dhe gazit, deklaroi kryeministrja Giorgia Meloni gjatë votëbesimit në Senat ku qeveria e saj siguroi 115 vota, çka do të thotë se ekzekutivi tashmë mund të nisë punën.

“Mendoj se edhe këtu duhet të punojmë me ndërhyrje të mirëkalibruara për të ndihmuar bizneset dhe familjet menjëherë, kryesisht duke i rikuperuar fondet nga fitimet shtesë, me një rregull që besoj se duhet të rishikohet”, tha Meloni.

Qeveria e Mario Draghit synonte të financonte një pjesë të masave të saj për të zbutur ndikimin e krizës energjetike mbi firmat dhe familjet përmes një takse të përkohshme prej 25% për kompanitë e energjisë, por të ardhurat në buxhet kanë rezultuar shumë më të ulëta nga sa pritej.

Meloni tha gjithashtu se qeveria e saj ishte e gatshme të punonte për masat kombëtare për të ndarë çmimin e gazit nga ato të burimeve të tjera të energjisë, me kusht që rregullat duhet të dakordohen në nivel europian.

Një synim tjetër ambicioz I qeverisë Meloni është edhe rritja e tavanit në përdorimin e parasë cash, që aktualisht është 2 mijë euro, pasi sipas saj, po penalizohen më të varfërit. Por, ende nuk ka një shifër sesa do të jetë vitin e ardhshëm. Në vendet e BE, kjo shumë varion, pasi në Austri, Gjermani, Luksemburg, Holandë, Hungari, Irlandë, Estoni, Finlandë dhe Qipro nuk ka kufi, duke arritur në Kroaci që ka pragun më të lartë me 15 mijë euro.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.