Rriten ndjeshëm asetet e sistemit bankar – Në janar totali u zgjerua në 1.899 trilionë lekë, 26 miliardë më shumë nga dhjetori 2022

Sistemi bankar ka vijuar shtimin e aseteve edhe për vitin 2023. Nga të dhënat zyrtare të sapopublikuara nga Shoqata Shqiptare e Bankave, në muajin janar totali i aseteve të sistemit rezulton mbi 1.3% më i lartë nga 31 dhjetori i vitit 2022. Nga 1.873 trilionë lekë në fund të vitit 2022, totali i asteve të sistemit bankar është rritur në 1.899 trilionë, pra me rreth 26 miliardë lekë.

Rritja krahasuar me vitin 2021 kur totali i aseteve ishte 1.783 trilionë rezulton në masën 5% në vitin 2022. Në masë të njëjtë janë rritur edhe depozitat në sistem, të cilat nga 1,488 trilionë lekë në vitin 2021, rezultojnë 1.562 trilionë në fund të vitit 2022.

Treguesit e sistemit bankar vijnë në një vit të veccantë, kur nga rritja e interesave të bonove të thesarit pritej zhvendosje nga depozitat në letra me vlerë të qeverisë. Gjë që ndodhi në një masë të caktuar pranë periudhës kur normat e interesave të bonove të thesarit prekën kulmin gjatë fundit të vitit 2022. Por tendenca u kthye shpejt në kah të kundërt me rënien e yieldeve të bonove të thesarit.

Rënia e fortë e normave të interesave të bonove të thesarit, veçanërisht gjatë muajit janar, ka shkaktuar edhe një zhvendosje masive të fondeve nga letrat me vlerë të qeverisë drejt depozitave bankare. Për muajt dhjetor 2022-janar 2023, totali i depozitave në sistemin bankar është shtuar me më shumë se 14 miliardë lekë, apo afërisht 140 milionë dollarë. Vetëm në këta dy muaj pra, depozitat në monedhë kombëtare janë rritur me 2.5%, ndërkohë që rritja është edhe më e dukshme krahasuar me muajin maj të vitit të shkuar, kur ato arritën vlerën më të ulët. Sipas të dhënave zyratre të Bankës së Shqipërisë, totali i depozitave në lekë është rritur me 36 miliardë lekë, ose me 5.2%.

Një masë e madhe e këtyre luhatjeve të depozitave lidhet drejtpërdrejt me atë që ka ndodhur me bonot e thesarit, dhe veçanërisht me mbireagimin e aktorëve pas pritshmërive se normat bazë të ineteresit, që përcaktojnë dhe yieldet e bonove do të rriten në mënyrë të pandërprerë edhe në vitin 2023, për shkak të inflacionit e ndërhyrjeve të mëtejshme të Bankës së Shqipërisë.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.